मलखं स्वयम्भुया प्रतापपुर क्षति

येँ (सन्ध्या टाइम्स)/स्वयम्भु महाचैत्यया न्ह्यःने जवय् च्वंगु शिखर शैलीया प्रतापपुर देगः मलखं कयाः क्षति जूगु दु। थौं सुथय् पौने ५ बजेपाखे वःगु मलखं कयाः प्रतापपुरया दक्षिणपाखेया ब्व बांमलाक क्षति जूगु खः ।

थुकिं यानाः प्रतापपुर दुना थ्यंक मवःसां क्वय्या ब्वय् हे क्षति जूगु कारणं दुना वइगु अवस्थाय् धाःसा थ्यंगु दु। यदि तुरुन्त हे क्षति जूगु ब्व मदयेकल धाःसा देगः छगलं हे क्वःदले फुगु खँ प्रत्यक्षदर्शीतय्सं धाःगु दु। यदि थ्व थः हे क्वःदला वल धाःसा उकिं झन बांमलाक दुर्घटना जुइफुगु खँ नं धाःगु दु। प्रतापपुरया उगु छकू ब्व बम तयाः मुइकू थें च्वंक ह्वांग जुइक क्षति जुयाच्वंगु दु ।

उगु देगः क्षति जुयाः छ्वर्म्हुया वंगु अप्पा कुचा जःखः च्वंगु मेमेगु छेँय् नं लाःगु खः। छ्वर्म्हुया वंगु अप्पा कुचा शान्तिपुर तक थ्यनाच्वंगु दु। प्रतापपुरय् च्वंम्ह द्यः छम्ह नं कुचा कुचा जुयाच्वंगु दु। अन मलः जूबलय् छगू कथंया कम्पन समेत जूगु खँ जःलाखःलां धाःगु दु। लिसें अन क्वसं च्वंगु फःचिया ल्वहं नं क्षतिग्रस्त जुयाच्वंगु दु। अथे हे स्वयम्भुया न्ह्यःनेसं च्वंगु तग्वःगु वज्र नं प्वाः गनाच्वंगु दुसा बज्र दिकातःगु मन्दःपाः नं ह्याकिं वनाच्वंगु दु। उगु इलय् अन द्यइके वइपिं मनूत थ्यनेधुंकूगु खःसां वहे इलय् वा वःगुलिं मनूत उखें थुखें फःचापाखे थ्वंगु वंगुलिं सुं नं घाःपाः धाःसा मजूगु खँ धाःगु दु। प्रतापपुरया ग्वाखनय् च्वनाच्वंपिं बखुंत धाःसा तःम्ह हे सिनाच्वंगु दु ।

लुमंकेबहः जू, २०६० सालय् थ्वहे प्रतापपुर बांमलाक मिं नयाः पूरा हे ध्वस्त जूगु खः। अबलय् उकियात क्वथ्यंक हे पियाः हानं जीर्णोद्धार याःगु खः ।

स्वयम्भु महाचैत्यया जवं जवं अज्याःगु हे आकारया निगः देगः दु। उकी छगःयात अनन्तपुर व मेगुयात प्रतापपुर धाइगु खः ।

स्वयम्भु महाचैत्य संरक्षण तथा व्यवस्थापन महासमितिया महासचिव महेन्द्रानन्द बुद्धाचार्यं मलखं क्षति जूगु प्रतापुरयात आः तुरुन्त हे दयेके माःगु खँ कनादीगु दु ।

थ्व विश्व सम्पदाया धलखय् लाःगु स्मारक जूगुलिं पुरातत्व विभागं दयेकेमाःगु खँ नं वय्कलं कनादिल। आः दयेकेबलय् स्यंगु थासय् जक दयेकां गाइगु खः वा पूरा हे पियाः न्हूगु हे दयेके मालीगु खः धइगु खँ धाःसा इन्जिनीयर हयाः अध्ययन याकाः जक निर्णय याये फइ धासें न्ह्यागु याःसां याकनं यायेमालीगु खँ वय्कलं कनादिल ।