गृह मन्त्रालय माओवादीयात हे बीगु संकेत
येँ (सन्ध्या टाइम्स)/सरकार गठनय् वयाच्वंगु कचवं साम्य यायेत आः एमालें विवादय् लानाच्वंगु गृह मन्त्रालय माओवादीयात हे बी फुगु संकेत पिहां वःगु दु ।
सरकारय् स्वनिगःया उचित प्रतिनिधित्व जुइ माल धइगु माग यासें म्हिगः डेलिगेशन वंपिं स्वनिगःया कार्यकर्ताततलिसे खँ ल्हासें सचिव युवराज ज्ञवालीं समस्या यदि ज्यंके हे मफया वन धाःसा गृह मन्त्रालय माओवादीयात हे त्वःतेगु जुइ धकाः लिसः बियादीगु खः।
अथे हे म्हिगः बीबीसी नेपाली सेवालिसे खँ ल्हासें एमालेया मेम्ह छम्ह केन्द्रीय दुजलं नं छगू मन्त्रालयया खँय् कचकच यानाच्वनेगु पक्षय् थःपिं मदु धासें गृह मन्त्रालय माओवादीयात बियाः जूसां थःपिं न्ह्याः वनेगु जुइ धयादीगु दु ।
उखे माओवादीया उपाध्यक्ष नारायणकाजी श्रेष्ठं ७ बुँदे सम्झौता पालना यायेगु धाःगु हे गृह मन्त्रालय माओवादीयात बीगु धाःगु खः धासें गृह थःपिंत बीगु खँ नं वहे सम्झौताय् उल्लेख दुगु दावी यानादीगु दु।
सचिव ज्ञवालीं आः न्ह्याम्हेस्यां विरोध याःसां सरकार ७ बुँदे सम्झौता पालना यानाः न्ह्याः वनेगु निर्णयलय् थ्यंगु जानकारी नं बियादीगु दु ।
स्वनिगःया प्रतिनिधित्व जुइमाःगु माग
सरकार गठन लिपा एमाले दुने ब्वलंगु कचवंयात कयाः स्वनिगलय् च्वंपिं नेकपा (एमाले) या थीथी नेवाः न्ह्यलुवा कार्यकर्ता व नेपाल लोकतान्त्रिक नेवाः संघया थीथी पदाधिकारीतय्सं पार्टीया मू ज्याकू बल्खुइ वनाः पार्टी सचिव युवराज ज्ञवालीयात नापलानाः याकनं विवाद ज्यंकाः मन्त्रिमण्डलयात पूर्णता बियाः संविधानया ज्यायात सुचारू यायेत ध्यानाकर्षण यात। उगु पुचलं माओवादीलिसे जूगु ७ बुँदे सम्झौतायात लागू यायेत व मन्त्रिमण्डलय् स्वनिगःया उचित प्रतिनिधित्व जुइकेत नं माग याःगु खः ।
उगु प्रतिनिधि मण्डलय् नेपाल लोकतान्त्रिक नेवाः संघया नायः सानुराजा शाक्य, त्रिरत्न शाक्य, युथ फोर्सया स्वनिगः इन्चार्ज रामेश्वर श्रेष्ठ लगायत करिब ५० म्ह कार्यकर्ता दुथ्याःगु खः। वय्कःपिंत सचिव ज्ञवालीपाखें सकारात्मक लिसः वःगु खँ धाःगु दु ।
