मन्त्रालय नं दुम्ह याकःचा अर्थमन्त्री

सरकार गठनय् अलमल जुयाच्वंसां उपप्रधानमन्त्री भरतमोहन अधिकारीयात अर्थ मन्त्रालयया नं जिम्मा बीगु खँय् सहमति जू कथं वय्कलं मन्त्रालयया जिम्मेवारी नं कयादीगु दु। खास यानाः न्हूगु बजेट तयार यायेमाःगु, कर आदि विषयया महत्वपूर्ण निर्णयत यायेमाःगु कारणं मेमेगु विवाद यथावत तयाः जूसां वय्कः छम्हेसित निं अर्थया जिम्मा बीगु ज्या जूगु खः। जिम्मा कयाखतं वय्कलं मन्त्रालय वनाः थःगु ज्या नं शुरु यानादीगु दु ।


राजनीतिक अस्थिरताया कारणं देय्या अर्थतन्त्र डाँवाडोल जुयाच्वंगु थ्व इलय् अर्थ मन्त्रालयया जिम्मा कायेगु अःपुगु ज्या अवश्य नं मखु। तर नेपालय् धाःसा मन्त्री जुइपिं मनूत मन्त्रालयया हाथ्या स्वीकार यायेत सिबें नं मन्त्री जुयाः मोजमस्ती यायेगु ल्याखं जक मन्त्रालयया जिम्मा कायेगु प्रवृत्ति दुगुलिं न्ह्याम्ह हे मन्त्री जूसां नं समस्या समाधानया ज्या धाःसा जुयाच्वंगु मदु। माओवादीं सरकार न्ह्याकाच्वंगु इलय् मेगु ख्यलय् खास हे प्रगति मजूसां तत्कालिन अर्थमन्त्री डा. बाबुराम भट्टराईं अर्थतन्त्रयात क्वातुकेगु ज्याय् धाःसा न्ह्यथनेबहःगु योगदान बिउगु खः। वय्कलं अबलय् छिउगु पलाःयात वयां लिपाया अर्थमन्त्रीं नं निरन्तरता बिउगु कारणं खास यानाः कर, राजश्व उठे यायेगु सवालय् प्रगति जुयाच्वंगु दु। लिपांगु इलय् वयाः कर, राजश्व ठगे याइपिं तःधंपिं व्यापारीतय्त कारवाही यायेगु ज्या नं न्ह्याकूगु दु। थौंया संक्रमणकालय् अर्थ मन्त्रालयं याःगु थ्व न्ह्यथनेबहःगु ज्या खः। आः माओवादीया हे समर्थनय् दयेकूगु सरकारया न्हूम्ह अर्थमन्त्रीं उबलय्या बांलाःगु ज्यायात नं निरन्तरता बिउसा भिं हे जुइ ।

More Stories Like this