एल. जि. आर.

नर्मदेश्वर प्रधान

खँयाखँय्

उबलय्। बाइरोड। त्रिभुवन राजपथ। मदुनि। स्वनिगलं पिने वनेत। पिनें वयेत छपु हे जक जक लँ। थानकोट, चन्द्रागिरि पर्वत। मचाबलय् उगु लं जि नं वने नं। न्हिछिं भिमफेदी थ्यं। भिमफेदीं अमलखगंज मोटरं वनेगु। उबलय् अमलखगंजं वीरगन्ज तक रेल सेवा दु। एन.जि.आर.। अर्थात नेपाल गवर्मेन्ट रेलवे। जिगु न्हापांगु रेलयात्रा एन.जि.आरं जुइ। चारकोश झाडी। घना जंगल। रेलमार्गं वनाच्वने। खः थे मखु थें। भचाभचा आः नं व लुमं। जि उबलय् मचा हे तिनि। जिं खनागु। जि च्वनागु ।

रेल एन.जि.आर.। उबलय् दः व चिग्वः मताः। व सिबें तग्वःगु रेल दु। जिं उबलय् मसिउनि। व रेल उबलय् ब्वां वं ताः। व सिबें अप्वः ब्वां वंगु रेल नं दइ। जिके ज्ञां मदुनि। रेलयात्रा उबलय् जितः न्ह्यइपुइ। न्हूगु अनुभव जुइ। सदां लुमनीगु ।

उबलय् अनेक ख्यालि न्यने। एन.जि.आर. बारे। एन.जि.आर. या गति तसंक हे कमजोर। धिमा। एन.जि.आर.या खासा गति। उबलय् थ्वयात कयाः गफ जुइ। न्यनागु दु। लुमं। धाइ। एन.जि. आर. न्ह्याइ। थःगु हे मन्दगतिं। प्यासेन्जरत कुहां वइ। इजार फ्यनी। मन तयेक च्व फाइ। इजार ची। अनं रेल ज्वनी। रेलय् च्वनी। रेल त्वःफी मखु। एन.जि.आर.या गति गुलि ग्यं। गुलि धिकिं। गुलि सुस्त। थ्व ख्यालि धापुतिं व्यक्त जुइ। थ्व लघु बाखनं उली। अनुभवीतय् म्हुतुं पिहां वःगु थ्व ध्याचू। उबलय् उलि मथू। ख्याःखँ थें ताइ। न्ह्यइपुसे च्वनी। थौं व धापू। व बाखं लुमंके। धायेत्यंगु छु? आशय थुइ ।

एन.जि.आर.या गति धात्थें मन्द। धिकिं। न्ह्याःगु हे खःला मखुला। नां जकया रेल। इत्यादिया संकेत याःगु जुयाच्वन। जिं थुइ ।

मदुथाय् अलःमा नं सिमा। एन.जि.आर.। नेपाःया आखिर उबलय् एन.जि.आरं. तरे याइ। नेपाः दुने रेलसेवाया शुभारम्भ जुइ। थौं ई पाइ। हिली। खतुं नेपालय् रेलमार्ग इतिहासं मूपुले मफुनि। वहे मुलु वहे सुका तिनि। विश्वय् बुलेट ट्रेनया आविष्कार जुइ। आधुनिक रेलयात्रां तुफान गति काइ। रफ्तारं न्ह्याइ। एन.जि.आर. म्हिगःया यथार्थ। थौं बाखँ जुइ। किम्बदन्ती खने दइ। थौंकन्हय् मस्तय् खेलौना रेल नं एन.जि.आर. सिबे दुर्त गतिं न्ह्याइ। अय्नं एन.जि.आर.यात ल्वःमंके मजिउ। ल्वःमंके फइ मखु। देशया सेवा थ्वं याःगु दु। थम्हं फुगु भार बहन याःगु दु।
थौं बुलेट ट्रेनया युग। युगं मू पुली। तःधंगु गति काइ। गतिवान विमानया आविष्कार जुइ। कंकर्ड हवाइजहाज आकाशय् ब्वइ। गतिं अभूतपूर्व गति काइ। एन.जि.आर. या खँ ल्हाये थौं मल्वः। ल्वइ मखु। ई मथूम्ह, युगलिसे न्ह्याये मसःम्ह जुइ। अय्नं एन.जि.आर. लुमनी। खँल्हाये। पुलांगु खँ लुमंके। एन. जि. आर. गयाः घना जंगल पार यानागु रोमाञ्चक अनुभूति लुमंके। न्ह्यइपुइ। पुलां जूगु मताः ।

उमेर वनी। युग न्हूगु वइ। न्हूगु चलन। न्हूगु रहनसहन। खने दइ। बिचाःत न्हून्हूगु लुइ। इलं गति काइ। तुफान गतिं न्ह्याइ। तर उमेरं थःत पुलां खंकी। पुलां याइ। पुस्तान्तरया अनुभूति बी ।

थौंकन्हय् जितः एन.जि.आर. लुमनी। साप लुमनाच्वनी। बासःदँ मयाक्क न्ह्यःया एन.जि.आर.या यात्रा थौं थें ताइ। एन.जि.आर. थःगु हे गतिं वनाच्वंगु दु। न्ह्यानाच्वंगु दु। जितः क्वबियाः। अविरल थ्व अनुभव पुनर्जिवीत जुयाच्वनी। एन.जि.आर. या लुमंती। थौं जि थुलि तने। एन.जि.आर. स्वयम थौं जिगु यथार्थया बिम्ब जुइ। जिगु चित्र। जिगु प्रतिक। उपमा। रुपक। जिगु कल्पनाय्। तर्कनाय्। एन.जि. आर. व जि एकाकार जुइ। जि एन.जि.आर.य् आरोपित जुइ। छधी। छथी हे जुइ। जिं सिउ। एन.जि.आर.या गति मन्द। धिमा। थौंया बुलेट ट्रेनया न्ह्यःने व निश्चल गतिहीन धाःसां जिउ। अयनं एन. जि.आर.यात जिं थःगु बिम्ब खनी। खंके। जितः थुकी हिनताबोध मदु। थ्वया धिमागति दुने जिं थःगु चाल खंके। खिन्नता मदु। सुनानं उपहास याइ। चिन्ता मदु। सुनानं नागःतुगः याइ। चिउताः मदु ।

थौं जि दुने। एन.जि.आर. बुलुहुँ न्ह्यानाच्वंगु ताइ। थःगु हे मतापय्। जिगु नशा-नशाय् न्ह्यपुइ। नुगलय्। एन.जि.आर.या किचः लाइ ।

जिं चतांमरिया खँ ल्हाये। थौं इलं पिज्जाया खँ ल्हाइ। जिं पाथीं लुयाः जन्मन्हि याये। इलं थौं केक तानाः बर्थडे याइ। जिं दुगु फुगु छेँय् दयेके। नये धाये। इलं थौं रेष्टुरेन्टय् वने धाइ। तामपाः। न्यासि वने। जिं धाये। इलं थौं ट्याक्सी सःती। जिगु संगीत मधुर। धिमा जुइ। थौंया इलं थ्वयेकेगु म्येँ तुफानी, गतिवान जुइ ।

जि एन.जि.आर.। एन.जि. आर. जिगु विम्ब जुइ। थौंया परिबेशय्। जि छुकछुक न्ह्याये। थौं ई बुलेट ट्रेन जुयाः जिगु न्ह्यःने न्ह्यानाच्वनी ।

More Stories Like this