रोनाल्डो पाखें सन्यासया घोषणा

नांजाःम्ह ब्राजिलियन फुटबल कासामि रोनाल्डों थःगु फुटबल करियरपाखें सोमवाः सन्यासया घोषणा याःगु दु । रोनाल्डों सोमवाः साउ पाउलोय् छगू पत्रकार सम्मेलनया दथुइ थुगु घोषणा याःगु खः ।

थःगु फुटवल करियरय् निक्वः तक ब्राजिलयात विश्वकप धेंधेंबल्ला त्याकेत ताःलाम्ह ३४दँया रोनाल्डों थःत अझ नं म्हितेमास्ति वःसां थःगु शरीरं मफुगुलिं करियर क्वचायेकेमाःगु खँ धाःगु दु ।

सन् १९९६, १९९७ व २००२या फिफा वर्ल्ड प्लेयर अफ द इयर जुइत ताःलाम्ह रोनाल्डों ९७ अन्तराष्ट्रिय कासाय् ६२गोल याःगु दु । रोनाल्डों थःगु करियरय् स्वंगू विश्वकप कासा म्हिताः १५ गोल रेकर्ड दु । विश्वकपय् रोनाल्डों याःगु १५ गोल हे छम्ह कासामिं विश्वकपय् याःगु आः तकया दलकय् अप्व गोलया ल्याः खः ।

रोनाल्डों अन्तराष्ट्रिय कासा बाहेक नांजाःगु फुटबल क्लबत बार्सिलोना, इन्टर मिलान, एसि मिलना, रियल म्याड्रिड लगायतया क्लबय् आवद्ध जुयाः ४६६ कासा म्हितुगु दुसाः ३२६ गोल याःगु दु ।

More Stories Like this