खनालयात निखेरं तीव्र दवाव

विवाद एमाले कुचा जुइगु सम्भावना?

येँ (सन्ध्या टाइम्स)/एमाले व माओवादी जानाः गठन याःगु सरकार एमाले दुनेया झलनाथ खनाल विरोधी गुटया तीव्र विरोधं यानाः पूर्णता काये स्वयां न्ह्यः हे धमाधम संकटय् लाना वनाच्वंगु दु। एमालेया खनाल विरोधी गुटं माओवादीयात गृह मन्त्रालय गुगुं हालतय् नं बी मफइगु व थः हे अध्यक्ष झलनाथ खनालं माओवादी अध्यक्षलिसे पुष्पकमल दाहाल 'प्रचण्ड' लिसे याःगु सम्झौता पालना याये मखु धयाहःगुलिं सरकारयात पूर्णता बियाः न्ह्याकेत थाकुया वःगु खँ धाःगु दु ।

एमाले दुनेया माधव नेपाल व खड्ग ओली पुचलं थज्याःगु दवाव बियाः पार्टी अध्यक्ष एवं प्रधानमन्त्री झलनाथ खनालयात ज्या यायेत थाकुयाच्वंगु दुसां मेखे खनाल पक्षधर पुचलं धाःसा नेपाल-ओली पुचःया थ्व दवावयात वेवास्ता यानाः जूसां न्ह्यःने न्ह्याः वनेत प्रम खनालयात दवाव बियाच्वंगु दु। सूत्रया कथं थ्व निगू पुचःया तानातानं यानाः एमालेया पार्टी एकतायात हे खतराय् लाका बीगु समेत खतरा पिहां वयाच्वंगु दु। छुं जुयाः थ्वहे विवादं यानाः एमाले निकू कुचा हे जुया वन धाःसां सरकारयात माओवादी थेंज्याःगु तःधंगु पार्टीया समर्थन दुगु कारणं खनालया सरकार धाःसा क्वःमदलीगु विश्लेषण समेत एमाले दुने जुया वःगु खँ सूत्रं धाःगु दु ।

उखे दकलय् विवादया विषय जुयाच्वंगु गृह मन्त्रालयया सवालय् नं यदि थःत गृहमन्त्री मदयेकेगु खःसा थः मन्त्रिमण्डलय् हे च्वने मखु धकाः गृहमन्त्री कथं प्रस्तावित बिष्णु पौडेलं ख्याच्वः बियाहःगु दु। खड्ग ओलीया हे निर्देशन कथं पौडेलपाखें थज्याःगु ख्याच्वः वःगु खँ सूत्रं धाःगु दु। छुं जुयाः पौडेलयात गृह बाहेक मेगु मन्त्रालय बिल धाःसा पौडेलं राजीनामा बी धायेधुंकूगु दु। पौडेलं अथे धाःगुया कारण माओवादीपाखें पौडेल बाहेक मेम्ह मनूयात गृहमन्त्री दयेकल धाःसा थःपिं थ्व विवाद त्वःतेत तयार दु धइगु 'सन्देश' छ्वयाहःगुलिं खः धाःगु दु। सरकारय् च्वनाः नं माओवादीया निरन्तर बिरोध यानाच्वनीम्ह पौडेलयात गृहमन्त्री स्वीकार याये फइ मखु धकाः माओवादीं धया हयाच्वंगु दु ।

मेखे ओली-नेपाल गुटं अनावश्यक रुपं दवाव बिया हःसां नं प्रम खनालं उकियात त्वाःथलाः न्ह्याः वनेगु ज्या मयाःगु कारणं वय्कःया थः हे पक्षधर मनूत नं तम्वया हःगु खँ सूत्रं धाःगु दु ।

एमाले दुने ब्वलंगु थ्व कचवंया दुने माओवादीं धाःसा थुगुसी छुं हे म्हितेगु ज्या मयासे उकियात न्ह्यःने च्वनाः स्वया जक च्वंगु खँ सूत्रं धाःगु दु। विवाद समाधान यायेत माओवादीं थःपिंसं हे माधव नेपाल व खड्ग ओलीलिसे वार्ता यायेत स्वयाच्वंगु खँ नं धाःगु दु ।