मुबारक धुंकाःया इजिप्ट व मध्यपूर्व

अन्ततः जनतां १८ न्हु तक त्यान्हु हे मचासे याःगु लगातार याःगु आन्दोलन फये मफयाः स्वीदँ तक यकःति शासन यानाच्वंम्ह इजिप्टया राष्ट्रपति होस्नी मुबारक शासन त्वःतेत बाध्य जुल। जनतां शुरुइ हे आन्दोलन याःगु इलय् उकियात थुइकाः पद त्वःतूगु जूसा वय्कः अझ नं सम्मानित व्यक्तित्व जुइगु खः। तर जनताया तीव्र विरोध फये मफयाः जक सत्ता त्वःतूगु कारणं वय्कः इजिप्टया इतिहासय् छम्ह कलंकित शासकया रुपय् म्हसियाच्वनीगु निश्चित जूगु दु ।

मुबारक बिसिउँ वनेवं तुं इजिप्टया आन्दोलनकारी जनताया माग पूवंगु मदुनि। उमिसं नागरिक शासन व निर्वाचित सत्ताया माग यानाच्वंगु दु। थ्व अझ नं प्राप्त मजूनि। मुबारकं त्वःता थकूगु सत्ता आः सेनाया ल्हातय् लाःगु दु। छुं जुयाः सेनाया नियत खराब जुल धाःसा इजिप्टय् अझ ग्यानापुगु तानाशाही कायम जुइफु। उकिं नागरिक सरकारया लागिं जनताया दवाव कायम हे जुयाच्वने मानि। इजिप्ट मध्यपूर्वया हे छगू महत्वपूर्ण व शक्तिशाली देय् जूगु कारणं अन जुइगु छुं नं कथंया घटनाया लिच्वः पूरा मध्यपूर्वय् नं लाः वनीगु निश्चित दु। मुबारकं सत्ता त्याग याःगु घटनां नं मुक्कं मध्यपूर्वय् प्रजातन्त्रया लहर वइगु संकेत पिहां वयाच्वंगु दु। थौंकन्हय् यमनय् जुयाच्वंगु जनआन्दोलन उकिया छगू दसि खः। थज्याःगु लहर मध्यपूर्व न्यंकं हे पिदनीगु उलि हे तःधंगु सम्भावना दु। यदि मध्यपूर्व थःगु परम्परागत शासन प्रणालीं पिहां वल धाःसा उकिं एशिया जक मखु अमेरिका व युरोपयात नं ईई पंका बीगु निश्चित दु। मुबारक धुंकाःया मध्यपूर्व धाथें नं स्वये बहः जुइफु ।

More Stories Like this