न्हूगु बजेट हयेगु सहमति
म्हिगः पुलांगु हे अध्यादेश ब्वनाः न्यंकल
येँ (सन्ध्या टाइम्स)/माओवादीया अध्यक्ष प्रचण्ड व प्रधानमन्त्री नापं एमाले अध्यक्ष झलनाथ खनाल दथुइ न्हूगु बजेट हयेगु सहमति जूगु दु। थौं सुथय् वालुवाटारय् निम्ह नेताया दथुइ जूगु वार्ताय् उगु सहमति जूगु खः। अध्यादेशयात प्रतिस्थापन यायेत हःगु विधयेक पारित यानाः तत्काल संकट ज्यंकेगु व सरकारयात पूर्णता बीधुंकाः न्हूगु बजेट हयेगु खँय् वय्कःपिनि दथुइ सहमति जूगु खः। माओवादी अध्यक्ष प्रचण्डं सरकारया नीति तथा कार्यक्रम नापं न्हूगु बजेट हयेगु सर्त तयादीगु खः। वय्कलं सरकार परिवर्तन जुइधुंकूगु अवस्थाय् पुलांगु हे बजेटयात निरन्तरता बी मफइगु खँ धयादीगु खः। लिसलय् प्रम खनालं राजश्व संकलनया अवस्था, प्राविधिक पक्ष नापं अध्ययन यानाः न्हूगु बजेट हयेगु खँ धयादीगु खः ।
वार्ताय् दुथ्याःम्ह माओवादी नेता देव गुरुङं संचारकर्मीलिसे खँल्हासें न्हूगु बजेट हयेगु सहमति २२ गते हे जूगु तर राजनीतिक कचमचं यानाः सम्भव मजूगुलिं अध्यादेशयात प्रतिस्थापन यायेत हःगु विधयेकयात निरन्तरता बीगु व सरकारया पूर्णता लिपा न्हूगु बजेट हयेगु सहमति जूगु जानकारी बियादिल ।
संसदं माधव नेपालया सरकारं अध्यादेशपाखें बजेट हयेधुंकाः उकियात प्रतिस्थापन यायेत सरकारं प्यंगू विधयेक दर्ता याःगु खः।प्रतिस्थापन विधयेक कंस फागुन ३ गते दुने पारित यायेमाःगु अवस्था दु। म्हिगःया संसदय् पुलांगु सरकारं हःगु अध्यादेश उपप्रधान लिसें अर्थमन्त्री भरतमोहन अधिकारीं हुबहु पेश याःगु इलय् माओवादी सभासदत विरोध मयासे मौन च्वंगु खः। तत्कालीन अर्थमन्त्री सुरेन्द्र पाण्डें थ्वहे बजेट पेश यायेत्यंबलय् माओवादी सभासद्तय्सं वय्कःयात हातपात यानाः ब्रिफकेस समेत लाका काःगु खः। कंस तकया दुने अध्यादेशयात संसदं पारित मयात धाःसा कर तकं उठे याये फइ मखु। थौं निम्ह नेताया दथुइ सरकारयात पूर्णता बीगु विषयय् सहलह जूगु जूसां निर्णय धाःसा मजूनि धकाः नं नेता गुरुङं कनादीगु दु ।
