सेनायात नं ७ बुँदे अमान्य

येँ (सन्ध्या टाइम्स)/प्रधानमन्त्री झलनाथ खनाल व माओवादी अध्यक्ष पुष्पकमल दाहाल 'प्रचण्ड' दथुइ जूगु ७ बुँदे सहमतिइ उल्लेख जुयाच्वं कथं माओवादी लडाकुया बिस्कं युनिट दयेकेगु धाःगु बुँदायात नेपाली सेनां नं अस्वीकार याःगु खँ सीदुगु दु ।

माओवादी लडाकुतय्त नं नेपाली सेनाया हे छगू अंगया रुपय् बिस्कं युनिट दयेकाः समायोजन यायेगु धकाः न्हय्गू बुँदाया उगु सम्झौताय् उल्लेख जुयाच्वंगु दु। उगु सम्झौताया खास यानाः निगू बुँदा - माओवादी लडाकुया अलग्ग युनिट दयेकेगु व पालंपाः सरकारया नेतृत्व यायेगुयात एमाले व कांग्रेसं विरोध यानाच्वंगु दु।थ्वहे इलय् वयाः नेपाली सेनापाखें नं लडाकुया बिस्कं युनिट दयेकेगु धइगु खँयात स्वीकार याये फइ मखु धइगु खँ पिहां वःगु जानकारी सूत्रं बिउगु दु। उगु बुँदा सेनायात स्वीकार्य जुइ मखु धकाः सेनाया उच्च अधिकारीतय्सं एमाले व कांग्रेसया नेतातय्त जानकारी बीधुंकूगु खँ नं सूत्रं धाःगु दु। थुकिं यानाः नं आः न्हय्गू बुँदे सम्झौतायात एमालेया अनुदारवादी नेतातय्सं स्वीकार यायेत थाकु चायेका हइगु खँ धाःगु दु ।

उखे न्हय्गू बुँदे सम्झौतायात एमालें परिमार्जन याये मानि धाःगु कारणं माओवादी आःयात मन्त्रपरिषदय् दुहां मवनीगु जूगु दु। छुं जुयाः माओवादी मन्त्रिपरिषद्य् दुहां वनाः परिषद्यात पूर्णता बिल धाःसां एमालेया खड्ग ओली पुचलं रक्षा मन्त्रालय छगू निर्वतमान रक्षामन्त्री विद्या भण्डारीया हे ल्हातय् लाकेगु कुतः यानाच्वंगु खँ नं सीदुगु दु। यदि विद्या भण्डारी रक्षा मन्त्री जुल धाःसां नं ७ बुँदेया उगु बुँदा लागू याये मफइगु खँ धाःगु दु ।