आखिर गृहय् छाय् थथे विवाद?

फुक्कं सुरक्षा संयन्त्र माओवादीं कायेत्यंगुलिं शंका

येँ (सन्ध्या टाइम्स)/झलनाथ खनालया सरकारय् गृहमन्त्री जुइम्ह सु धइगु खँय् दकलय् अप्वः विवाद जूगुया कारण छु? आखिर गृह मन्त्रालयपाखे एमाले व माओवादीया थपाय्धंगु आकर्षण छाय् जुल?

पिनें स्वयेबलय् थुकी गृह मन्त्री जुइसातकि दइगु शान व शक्ति हे प्रमुख खँ थें च्वनी तर थुकियात मेगु पार्टीतय्सं धाःसा तसकं ग्यानापुगु विषयया रुपय् कयाच्वंगु खँ सीदुगु दु ।

उकुन्हु तक माओवादीयात गृह मन्त्रालय बी मजिउ धकाः एमालेया ओली गुटं जक दावी यानाच्वंगु खःसा आः उकी नेपाली कांग्रेस नं स्वाः वंगु खँ सूत्रं धाःगु दु। कांग्रेस सूत्रं धाः कथं आःया मन्त्रिपरिषद् माओवादीं रक्षा मन्त्रलय नं कायेगु धयाच्वंगु दु। यदि गृह व रक्षा निगुलिं मन्त्रालय माओवादीं काल धाःसा देय्या सेना, प्रहरी व सशस्त्र प्रहरी थेंज्याःगु स्वंगुलिं हे सुरक्षा निकाय माओवादीया ल्हातय् वनी। थ्व बाहेक जनयुद्ध ल्वाःपिं लडाकुत ला आः तक नं माओवादीया हे कमाण्डय् दनि। अथे हे सैन्य संरचनाय् च्वनीपिं वाईसीएल नं आः तक माओवादीं भंग याःगु मदुनि। थुकथं माओवादीं सुरक्षा सम्बन्धी फुक्क हे निकाय थःपिनि ल्हातय् लाकेत्यंगुया मू कारण कन्हय् बलया लिधंसाय् सत्ता कब्जा यायेत खः धइगु विश्लेषण कांग्रेसं याना हःगु खँ सूत्रं धाःगु दु। फुक्क हे सुरक्षा संयन्त्र माओवादीयात बीगु तसकं खतरनाक जुइफु धकाः आः थुकी कांग्रेसं नं विरोध याना हःगु खँ धाःगु दु ।

उखे माओवादीं धाःसा थःपिनि मू खँ ७ बुँदे सम्झौता खः, गृहमन्त्री मखु धायेगु याना हःगु दु। अथे खःसां एमालें गज्याःम्ह मनूयात गृह मन्त्रीया रुपय् प्रस्तावित याःगु खः व नं माओवादीयात मययाच्वंगु खँ सूत्रं धाःगु दु। एमालें गृहमन्त्री दयेकेत्यंम्ह बिष्णु पौडेल ओली गुटयाम्ह खःसा वय्कः माओवादीया कडा आलोचक नं खः। वय्कःया पलेसा मेम्ह मनूयात गृह बिल धाःसा माओवादीं स्वीकार यायेफु धाःगु दु ।

७ बुँदे सम्झौताय् सहमति कायम
एकीकृत माओवादी व एमालेया दथुइ जूगु न्हयगू बुदाया सहमति कार्यान्वयन यायेत प्रतिवद्ध जूगु दु। म्हिगः बुधवाः निगू दलया विशेष कार्यदलया बैठकय् अथे प्रतिबद्धता प्वंकूगु खः। बैठक लिपा संचारकर्मीतलिसे खँल्हासें एकीकृत माओवादीया उपाध्यक्ष नारायणकाजी श्रेष्ठं सहमति कार्यान्वयनया सवालय् विवाद अन्त्य जुल धयादीगु दु। उगु बैठकय् एकीकृत माओवादीया श्रेष्ठ नापं दीनानाथ शर्मा, देव गुरुङ, पोष्टबहादुर बोगटी अले एमालेपाखें वामदेव गौतम, ईश्वर पोख्रेल, भरतमोहन अधिकारी व विष्णु पौडेलं ब्वति कयादीगु खः। वंगु २० गते जूगु निगू दलया न्हय्गू बुँदाया सहमतियात कयाः थ्वसिबें न्ह्यः नं एकीकृत माओवादीया अध्यक्ष प्रचण्ड व एमालेया अध्यक्ष झलनाथ खनालं मंकाः कथं सहमतियात कार्यान्वयन यायेगु धकाः प्रतिबद्धता प्वंकेधंकूगु दु ।