वाम प्रगतिशील सरकार हे दयेकेमाः

श्रीकृष्ण महर्जन

एमाले अध्यक्ष झलनाथ खनाल प्रधानमन्त्रीइ निर्वाचिन जुयादीवं नेपाली कांग्रेस व मधेसवादी दलया नापनापं पुलांपिं पंचत हीमी चाःगु दु। इमिसं ला आः वाम गठबन्धन याना वनेत्यंगु विश्लेषण यासें झलनाथ खनालया सरकारयात गुगुं नं हालतय् टिके याये मखु धकाः सार्वजनिक रुपं हे न्ववायेगु शुरु यानाहःगु दु। उलि जक मखु नेपाली कांग्रेस संसदीय दलया बैठकय् च्वनाः एकीकृत माओवादी व एमाले दथुइ जूगु ७ बुँदे सम्झौतायात गुगु नं हालतय् कार्यान्वयन याके बीगु जुइ मखु धकाः नं निर्णय याःगु दु। अझ माल धाःसा सतक आन्दोलन यायेगु ख्याच्वः तकं उमिसं बिउगु दु।
छखे नेपाली कांग्रेस, मधेसवादी दल नापं पुलांपिं पंचत उगु सम्झौता विरुद्ध वइगु मेखे स्वयं एमालेया हे नेतातय्सं नं उगु सहमतियात कार्यान्वयन याके मबिसे पंगः थंगु धइगु तसकं बिचाः यायेमाःगु अवस्था खः। एमालेया केपी शर्मा ओली व माधवकुमार नेपालं सहमति कार्यान्वयन मयाकेगु नितिं पंगः थंगु धइगु हे अप्रत्यक्ष रुपं कांग्रेसयात साथ बीगु ज्या याःगु खः ।

एमालेया नेतातय्त गुगु नं हालतय् सहमति कार्यान्वयन मयायेत दबाव बीगु अले सहमति कार्यान्वयन मजुल धाःसा माओवादी प्रतिपक्षय् च्वनीगु इलय् एमाले अध्यक्ष खनालया सरकारयात कांग्रेस व मधेसवादी दलतय्सं समर्थन यायेगु धकाः प्रस्ताव तकं तयेगु यानाहःगु दु। खनालया सरकारपाखें माओवादीयात पिने तयेगु नापं सहमति कार्यान्वयन याके मबीफत धाःसा माओवादीया साइज भारतया योजना कथं घटे याये फइगु तायेका अज्याःगु प्रस्ताव हयाच्वंगु स्पष्ट हे जू ।

छखे कांग्रेस व मधेसवादी दलतय्सं भूमिका म्हितेगु जक मखु स्वयं एमालेया हे ओली व माधव पक्षया नेतातय्सं भूमिका म्हितेगु मेखे वाम प्रगतिशिल गठबन्धनयात ल्यंका तयेगु कुतः याइपिं अलमल जुइगु पाय्छिगु खँ मखु। खय्त ला न्हूम्ह प्रधानमन्त्री झलनाथ खनालं आः थःत वःगु भोट व वाम दलत नापनापं प्रगतिशिल दलत छथाय् वःगु धइगु बाम प्रगतिशील गठबन्धन यानागु अर्थात ध्रुवीकरण यानागु मखु धकाः धयादीगु दु। देय्या हे प्रधानमन्त्री जुइधुंकूगु अवस्थाय् वाम प्रगतिशील गठबन्धन यायेगु धायेगु पाय्छि नं मजूगु हे खः तर यथार्थय् धाःसा प्रधानमन्त्रीया चुनावं वाम प्रगतिशील गठबन्धन जूगु हे खः। उगु गठबन्धन खनाः हे भारत झस्के जूगु अले कांग्रेस, मधेसवादी नापं पुलांपिं पंचत हीमी चाःगु खः ।

नेपाःमि जनतां संविधानसभाया माध्यमं गुगु मत बिउगु खः व आधारय् संविधानसभाया बहुमत सिबें अप्वः बाम प्रगतिशील पक्षय् थ्यंमथ्यं दुई तिहाई बहुमत दु। थुकथं जनतां बाम प्रगतिशीलया पक्षय् मत बिउगु खःसां वाम पार्टीतय्सं विशेष यानाः माओवादी व एमालेया नेतातय्सं बाम प्रगतिशील एकताय् न्हापा न्हापा कुतः मयाःगु जूसां अन्ततः लिपांगु इलय् गुकथं वाम प्रगतिशिल गठबन्धन जू वन उकियात सकारात्मक हे धायेमाः। सुनां आःया अवस्थाय् प्रगतिशील संविधान वयेमाः धकाः चाहना याइ उमित अवश्य नं आःया गठबन्धन बांलाः ताइ। मेपिंत थ्व गठबन्धनं कपाः स्याकीगु स्वाभाविक हे जुल ।

यदि आःया गठबन्धन कायम याना वनेगु जूसा दकलय् अप्वः संविधानसभाया तःधंगु दल जूगु ल्याखं माओवादी हे जिम्मेवार जुयाः न्ह्याः वनेमाःगु अवस्था दु। उलि जक मखु एमाले लिसे जूगु ७ बुँदाया सहमति कार्यान्वयन याकेगु जूसां नं वर्तमान गठबन्धनयात ल्यंका हे तयेमाः। अले भारत पक्षधर दल व नेतातय्त राजनीतिइ हावी मयाकेगु खःसा नापं जनताया नितिं संविधान दयेकेगु हे जूसां आःया गठबन्धनयात ल्यंकाः न्ह्याः वनेमाःगु दायित्व नं माओवादीया ब्वहलय् वःगु दु ।

अथे वाम प्रगतिशील गठबन्धन ल्यंका तयेगु जूसा मन्त्रीतय्गु भागबन्डा मिले मजूसां नं वर्तमान सरकारयात ल्यंका तयेगु नितिं यदि माल धाःसा माओवादीं थःपिं सरकारय् मवँसे जूसां खनालयात समर्थन यायेमाः। तर एमालेया अध्यक्ष खनाललिसे जूगु सम्झौतायात धाःसा कार्यान्वयन याकेगु नितिं पिने हे च्वनाः बः बियाच्वनेमालीगु अवस्था दु। अथे झलनाथ खनालया सरकारयात पूर्णता बीगु नितिं थःपिं मदुसां मेमेगु दल गुमिसं झलनाथ खनालयात मतदान यात इमित दुथ्याकाः याकनं हे मन्त्रिमण्डल दयेकेमाःगु अवस्था दु। मन्त्रिमण्डल दयेकेगु नितिं दकलय् न्हापां माओवादीं हे नुगः चकंकेमाःगु आवश्यकता दु। थुगु खँय् ध्यान बीफत धाःसा न्ह्याबलें मन्त्री जुइमाःपिं नेपाली कांग्रेस व मधेसवादी दलत ताः ई तक छथाय् च्वने फइ मखु। उकिया नितिं इमिगु दथुइ नं कचमच जुइगु स्वाभाविक खः। उकिं यानाः स्वयं वाम प्रगतिशील गठबन्धनयात हे लबः वइगु खँयात नं ध्यान तयेमाःगु अवस्था दु। थ्व नेपाःया बहुसंख्यक श्रमजीवी जनताया निंतिं नं माओवादी व एमालेया शीर्ष नेतातय्सं थुइकेमाः। माओवादीं छुं छगू पदया नितिं अडान कायेगु सिबें नं एमालेलिसे जूगु सम्झौतायात कार्यान्वयन याकेगु ज्याय् बः बीफत धाःसा उकिं तःधंगु उपलब्धी जुइ। माओवादीया सेना समायोजन नापं सरकारया नेतृत्व पालंपाः कायेगु अले जनताया भावना कथं संघीय लोकतान्त्रिक गणतन्त्रात्मक संविधान दयेकेगु ज्या जुइ फत धाःसा नेपाःमि जनताया निंतिं तःधंगु उपलब्धि जुइ। यदि आःया अवस्थाय् माओवादीं बिचाः याये मफुत धाःसा हाकनं नेपाःया राजनीतिइ भारतवादीतय्सं म्हिताः न्हुगु संविधान हे जारी मयाकीगु अवस्था नं वयेफु ।

कांग्रेस, मधेसवादी, पुलांपिं पंच नापं एमालेया भारतीय लबिया मनूत सक्रिय जुयाः झलनाथ खनालया नेतृत्वय् दयेकीगु सरकायात क्वःथलाः हाकनं पुलांगु हे समीकरणय् वनेगु कुतः जुयाच्वंगु अले वाम प्रगतिशील पक्षयात तछ्यायेगु भूमिका म्हिताच्वंगुयात एकीकृत माओवादीया शीर्ष नेतातय्सं ध्यान बियाः पलाः छीमाःगु दु। थुगु खँय् माओवादीया नेतातय्सं ध्यान तये फत धाःसा व माःगु कथं पलाः छीफत धाःसा एकीकृत माओवादीया निंतिं नं बांलाःगु हे ज्या जुइ। थ्व अवसरयात माओवादीं सितिकं छ्वये मजिउ ।

More Stories Like this