प्रधानमन्त्री खनालया परीक्षाया इ

प्रधानमन्त्री झलनाथ खनालयात मन्त्रिमण्डल गठन यायेत थाकुयाच्वंगु दु। थ्व थाकुगुया कारण धाःसा वय्कः थः हे मखुसें वय्कःया पार्टी दुने च्वंपिं छुं अज्याःपिं नेतात खः गुपिं वंगु संविधानसभाया चुनावय् पराजित जूपिं खः। संसदीय व्यवस्था मूलतः प्रधानमन्त्रीं सरकार चले याइगु व्यवस्था खः। उकिं सरकार गठनया पूर्ण ज्या प्रधानमन्त्रीयात हे त्वःता बीमाः। तर खनालयात नियतवस हे थ्व थ्व मन्त्रालय थःपिंत हे माः धइगु अडान कायेकाः सरकार गठनया ज्याय् पंगः थनाच्वंगु दु। उकिसनं थ्व ज्या चुनावय् बूपिं नेतातय् कमाण्डय् जुयाच्वंगु कारणं उमिसं खनालयात असफल यायेगु लागिं हे थज्याःगु पलाः ल्ह्वनाच्वंगु खः धकाः अनुमान यायेफु। लिसें खनालं माधव नेपालया सरकारयात ग्वाहालि मयाः धइगु खँया ब्वलासायेगु ल्याखं हे थथे यानाच्वंगु खः धकाः नं धायेफु ।

तर भाजु खनाल पार्टीया अध्यक्ष खयां नं थःगु पार्टी दुनें वयाच्वंगु थज्याःगु पंगःयात चीके मफुगु धाःसा वय्कःया कमजोरी खः। पार्टी अध्यक्ष जुसेंलि वय्कलं अध्यक्षया हे शक्ति प्रयोग यानाः म्वाः मदुगु खँय् विरोध याइपिंत छखे चीका छ्वयेमाःगु खः। वय्कलं माओवादीलिसे याःगु न्हय्गू बुँदे सहमतिया विषयय् तकं पार्टी दुने अडान काये फयाच्वंगु मदु। यदि अडान काये मफुगु खःसा अज्याःगु सम्झौता हे छाय् यायेमाल? पार्टी अध्यक्ष व प्रधानमन्त्री थेंज्याःगु थासय् थ्यनेधुंकाः नं यदि वय्कलं न्हापा थें हे अडान मदुगु ज्या याना जुल धाःसा थ्व वय्कःया राजनीतिक जीवनया हे अन्तिम अवसर जुइफु। वय्कलं थःगु नेतृत्व क्षमता व कार्यकुशलता पुष्टि यायेगु पाय्छि ई थ्वहे खः ।

More Stories Like this