किपू महोत्सव चाःहिलेधुंकाः

वंगु माघ १९ गतेनिसें २३ गते तक किपुली न्यान्हुयंकं किपू महोत्सव जुल। नेपाल पर्यटन वर्ष-१११२ यात लक्षित यानाः न्यायेकूगु उगु महोत्सव स्वंगू लख स्वकुमितय्सं स्वःगु आयोजकया दावी दु। उकी मध्ये २ प्रतिशत विदेशी पर्यटक दुथ्याः। किपूया झिंप्यंगू नाकां दुहां वइपिं आन्तरिक पर्यटकतय्त म्हतिं नीन्यातका दां कयाः महोत्सव स्वकूगु खः। मू बजाः चाःहिलेगु लँय् बासा लायाः लसकुस यानातःगु थ्व महोत्सवया बांलाःगु पक्ष खः। ध्वाखां दुहां वंसांनिसें थाय्थासय् वः, चतांमरि, यःमरि, छ्वय्लाबजि आदि थेंज्याःगु नेवाः नसा मीगु ज्या जुयाच्वंगु खः। अथे हे नेवाः जातिं छ्यलीगु थीथी हलंज्वलं, थलबल व लवःकवःत नं थाय्थासय् ब्वयातःगु खः ।

किपुली थीथी इलय् जक जुइगु थीथी कथंया जात्रापर्वत नं महोत्सवया इलय् पिकयातःगु खः। थुकिं मुक्कं किपू जक मखु दछियंकंया किपू नं छगू हे इलय् स्वयेगु अवसर स्वकुमितय्त चूलात ।

किपू महोत्सव मूल आयोजक समितिया संयोजक लक्ष्मीकुमार महर्जनं बियादीगु जानकारी कथं महोत्सव छचाः हिलेत स्वघौत्या ति ई माः। महोत्सवय् किपूया १, २, ३, ४, ५, ६ व १७ वडायात दुथ्याकातःगु दु। किपूया रिङरोड दुने लाःगु थुगु न्हय्गू वडा मध्ये नं ध्वाखां दुने लाःगु गुँदे धाइगु पुलांगु किपुली थ्व महोत्सव न्ह्याःगु खः। महोत्सवय् देय्न्यंकं यानाः ११९ गू स्टल तयातःगु खः। थुकी अनया अन हे थीथी ज्वलं उत्पादन यायेगु लिसें मीगु ज्या नं जूगु खः। कुम्हाःतय्सं चाया भाराकुरा दयेकाच्वंगु, मूर्ति तयार यानाच्वंगु प्रत्यक्ष क्यनातःगु खः ।

महोत्सवय् पृथ्वीनारायण शाहं किपू आक्रमण याःबलय् वया किजा सुरप्रताप शाहयात मिखाय् कयेकूगु गुतांचा निसें कयाः २०४६ सालया जनआन्दोलनय् स्थानीय जनतां छ्यःगु ल्वाभः तकं ब्वयाः किपूमिया वीरता चिं नं प्रदर्शन यानातःगु खः। किपू छु खः व किपूया गौरव छु खः धइगु क्यनेत ताःलाःगु थुगु महोत्सवय् न्यादँ दुने किपूयात पूर्ण रुपं फोहोर मुक्त थाय् दयेकेगु, स्वरोजगार व आर्थिक विकासय् बः बीगु नापं पर्यटकतय् गन्तब्यस्थल कथं विकास यायेगु दीर्घकालीन लक्ष्य तःगु दु ।

'झीगु किपू झीगु तजिलजि' धइगु मूल नारा बियाः न्ह्याकूगु थुगु महोत्सवय् कुतुसाः, लाय्कू, वाइगां, चाफः लगायत झिंन्यागू थासय् नेवाः कला संस्कृति पिज्वइ कथंया प्याखं नं क्यनातःगुलिं किपूया गुगुं छगू लागा जक मखु मुक्कं किपू देय् हे संस्कृतिया तःमि खः धकाः थुइकेत अःपुका बिउगु दु ।

More Stories Like this