पौडेलया नामय् एमालेय् विवाद
मन्त्री नियुक्तिया खँय् पार्टी दुने तीव्र असन्तोष
येँ (सन्ध्या टाइम्स)/झलनाथ खनालया सरकारय् एमाले सचिव बिष्णु पौडेलयात गृहमन्त्री दयेकेगु प्रस्ताव यायेवं उकियात कयाः माओवादीं जक विरोध याःगु मखुसें स्वयम् एमाले दुने हे नं थीथी नेतातय्सं आपत्ति प्वंकाहःगु खँ सीदुगु दु ।
पार्टीइ केपी ओली पक्षधरधयातःम्ह पौडेलयात मन्त्री दयेकल धकाः मेपिं नेतातय्सं खुल्ला रुपं हे विरोध याना हःगु खँ सीदुगु दु। एमाले पोलिटब्युरो दुजः रामचन्द्र झां ला पौडेलयात 'राजनीतिक वेश्या' धइगु संज्ञा बिसें अज्याःम्ह मनूयात मन्त्री दयेकल धकाः न्ह्याथाय् वंसां विरोध यानाच्वंगु खँ सीदुगु दु। झालिसे सतीगु छगू सूत्रं धाः कथं थौंकन्हय् झां पौडेलयात कयाः थथे धायेगु यानाच्वंगु दु - पौडेल धइम्ह सुथय् ओलीयाथाय् च्या त्वनाः न्हिनय् झलनाथ खनालयाथाय् ज्यःनाः व सनिलय् माधव नेपालयाथाय् बजि नयाः न्हिनय् वामदेव गौतमयाथाय् बेलि याः वनीम्ह मनू खः ।
एमाले नेतातय्सं पौडेलयात गृहमन्त्री दयेकेगु स्थायी समितिया निर्णय पाय्छि मजू धायेवं थुकियात कयाः मेगु विवाद जुयाच्वंगु दु ।
थ्व स्वयां न्ह्यः माओवादी अध्यक्ष प्रचण्डया नेतृत्वय् दुगु सरकारय् पौडेल जलश्रोत मन्त्री जूगु खःसा व स्वयां न्ह्यः नं मन्त्री जुइधुंकूम्ह खः। वय्कःयात बिचाः सिबें नं नेतातय् लिउलिउ जुइम्ह नेता खः धासें पार्टीं नेताया चाकरी याइपिंत जक मन्त्री दयेकल धकाः नं विरोध जूगु दु।
सूत्रं बिउगु जानकारी कथं खनालया नेतृत्वय् सरकार गठन जुइवं पार्टी स्थायी समितिया बैठकय् केपी ओलीया हे प्रस्ताव कथं पौडेलयात गृहमन्त्री दयेकेगु निर्णय याःगु खः। पौडेलयात गृहमन्त्री दयेकेगु धकाः एमालें यकःति निर्णय यायेवं माओवादीं विरोध याःगु खःसा वहे विरोधया कारणं पौडेलया सपथ ग्रहण रोके जूगु खः ।
सूत्रं बिउगु जानकारी कथं उपप्रधान व अर्थमन्त्रीइ प्रस्तावित भरतमोहन अधिकारीयात नां स्वयम् प्रधानमन्त्री झलनाथ खनालं हे प्रस्तुत यानादीगु खःसा शिक्षा मन्त्रीइ गंगालाल तुलाधरया नां माधव नेपालं प्रस्ताव यानादीगु खः ।
एमालेया स्वम्ह शीर्ष नेतातय्सं थःथः लिक्क लाःपिं नेतातय्गु नां जक मन्त्रीया रुपय् प्रस्तावित यानाः मेपिंत वेवास्ता याःगुलिं एमाले दुने नं विचार सिबें चाकरीया संस्कार ब्वलन धकाः विरोध जुया वःगु दु। एमालें आः नां बिउपिं नेतातय् मन्त्रालययात कयाः माओवादीं विरोध यानाच्वंगु दुसा उमिगु चरित्रयात कयाः एमाले दुने हे विरोध जुयाच्वंगु दु ।
