नमोतस्स भगवतो अरहतो...

प्रेमलक्ष्मी तुलाधर

नमोतस्स भगवतो अरहतो सम्मासम्बुद्धस थ्व झीसं बुद्ध धर्मयागु हरेक ज्याझ्वः जुइगु बखतय् गथे कि बुद्ध पुजा, महापरित्राण पाठ आदि ज्याझ्वलय् न्हापालाक्क बुद्ध भगवान् प्रति सम्मानपूर्वक देछाइगु भावार्थ अर्थ दुगु खँग्वः खः
।
थुकिया अर्थ अनेक दु तर झीसं सिउ कथं भगवान् बुद्ध ब्रम्हादी देव मनुस्यपिंसं पूजा याये योग्यम्ह, गबलें नं गुप्त पाप मयाइम्ह, सर्वज्ञानं पूर्णम्ह, त्रिलोकया अधिपति भगवान् बुद्धयात नमस्कार ।

थ्व अतिकं च्वछायेबहगु, भावार्थ अर्थ पूवंगु खँग्वः गबलय्निसें वल, दकलय् न्हापा सुनां थ्व उद्गार पिकाःगु धइगु विषयय् खँ छत्वाःचा न्ह्यथने ।

छन्हु निम्ह पासापिं लँय् ध्वदुक्क नाप लात। वय्कःपिनिगु नां खः शरण ब्राम्हण व धर्म ब्राम्हण ।

शरण ब्राम्हण धर्म ब्राम्हणयात न्यन - छपिं गन बिज्यानागु?" धर्म ब्राम्हणं धाल - "जि भगवान् बुद्धया उपदेश न्यना वयागु। वसपोलयागु धर्म उपदेश न्यनाः मन नं म्ह नं याउँसे च्वं ।"

'मन नं याउँसे, म्ह नं याउँसे च्वंक बाखं कने सःम्ह छपिनि भगवान् बुद्ध गुलित प्रज्ञावानं युक्तम्ह खः छकः बयान यानाबिज्याहुँ धकाः शरण ब्राम्हणं धाल। अथे धायेवं "वसपोल गुलित प्रज्ञावानं युक्तम्ह धकाः ला वर्णन याये मफु तर वसपोल भगवानं अनन्त गुणं पूर्णम्ह बयान यानां साध्य मजू तर जिं सिउथें कने धकाः" धर्म ब्राम्हणं कना यंकल -

१. भगवान् बुद्ध धइम्ह तांन्वःगु बखतय् व याये थ्व याये मदयाच्वंम्ह मनूयात यच्चुसे च्वंगु पुखू खनीबलय् म्वःल्हुयाः आनन्द जुइ थें खः।
२. ल्वय् जुयाच्वंम्ह ल्वगियात वैद्य डाक्टरयागु वासलं ल्वय् लंका बीम्ह थें खः भगवान् बुद्ध।
३. दुःख जुयाः मन सन्ताप जुयाः घाः जुयाच्वंगु मनयात मलम पानाः दुःख मदयेका बीम्ह थें खः भगवान् बुद्ध।
४. श्रीखण्ड चुलेबलय् गथे नस्वाः वइगु खः व थें खः भगवान् बुद्ध।
५. नयेपित्याःबलय् साःगु नसा नयाः प्वाः जाइ थें खः भगवान् बुद्ध।
६. लँ तनाः अन वने थन वने मसियाः अतःमतः कंम्ह मनूयात लँ लुइका बीम्ह थें खः भगवान् बुद्ध।
७. अनन्त गुणं पूर्णम्ह खः भगवान् बुद्ध।

पासा धर्म ब्राम्हणयागु खँ न्यनाः भगवान् बुद्ध प्रति सुख अनुभव जुयाः शरण ब्राम्हणं सुभाषित वचनं उद्गार पिज्वल "नमोतस्स भगवतो अरहतो सम्मासम्बुद्धस्स" धकाः स्वक्वः तक ब्वनाः भगवान् बुद्ध च्वनाबिज्याःगु थासय् स्वयाः अत्यन्त हर्ष जुयाः वन्दना ज्वज्वलपा यानाः अभिवादन यानाबिज्यात ।

थुबलय्निसें हे नमोतस्स ... धायेगु चलन प्रचारप्रसार जुयाः हलिमय् न्यंकभनं प्रचलन जुयाः थेरवाद बुद्ध धर्मय् प्रचलित सम्मानित खँग्वः जुयाः बुद्ध धर्मया अनेक ज्याझ्वलय् दकलय् न्हापां न्ववायेगु जुया वंगु खँ वर्मी भन्तेनं कनाबिज्याःगु खः ।

बुद्ध भगवान्यागु न्हय्वः मू खँया बयानं शरण ब्राम्हण पासायागु मन प्रीति हर्ष जूगु खनाः गौरव तायाः भगवान् बुद्ध प्रति छ्यं क्वछुनाः वन्दना यानाच्वन धर्म ब्राम्हणं।
थथे भन्ते, गुरुमांपिनिगु उपदेश न्यनेबलय् मथूगु खँ थुइ, न्यने मनंगु खँ न्यने दइ, चित्त शुद्ध जुयाः बारम्बार न्यन कि न्ह्याबलें लुमनाच्वनी ।

थथे न्यने मनंगु खँ न्यने दुगु हे उत्तम श्रवण मंगल धर्म धइगु खँयात थुइकाः शरण ब्राम्हणं बुद्ध भगवान्यागु जम्मा न्हय्वः मू खँयात थुइकू थें आध्यात्मिक, धार्मिक, व्यवहारिक रुपं झीसं नं अथे हे थुइका वन धाःसा शरण ब्राम्हणयागु श्रद्धा थें क्वातुगु, ल्वहंतय् कियातःगु श्रद्धा थें ताःलाइ ।

बुद्ध धर्म धइगु मानव धर्म जूगुलिं उपदेश न्यना थें व्यावहारिक जीवनय् भिं कथं श्रद्धा धर्मचित्त उत्पन्न यायेगु यात नं धर्मप्रचार धाइ। गथेकि धर्म ब्राम्हणं शरण ब्राम्हणयात भगवान् बुद्धयागु मुख्यगु उपदेश गुणयात बयान यानाः धर्म प्रचार यायेगु तरिकां यानाः शरण ब्राम्हणया मन भगवान्यागु छुं हे खँ मसिउसां मू खँपाखें थुइकेगु शक्ति प्राप्त यानाः कायेफुगु, थुकियात हे धाइ धर्म प्रचार ।

बांलाःगु नरम व्यावहारिक स्वभावं फुकसिगु मनयात त्याका कायेफुगु बानी नं धर्म प्रचार यायेगु तरिका खः।
थःपिंत स्वचित्त स्वमनं पूजाभलय् स्वां, सिन्हः, जाकि, नैवद्य आदि तयाः पूजा यायेगुयात नं पुजा धाइ। व नं छगू वरदान खः। तर बुद्ध भगवान्यागु पुजा फुकेसितं ज्ञान बियाः बोध यानाः पुजा याःगुया अर्थ ज्ञानं मिखां खंकाः यायेगु ज्याखँयात हे धर्म पुजा धाइ ।

धर्म धायेवं तुं थःगु शरीरयात दुःख जुइक लः छफुति हे मत्वँसे अप्सं च्वनां छुं जुइ मखु। व छगू कष्टकर धर्म जक खः। तर शरीरयात दुःख बियाः धर्म जुइ मखु ।

शरीर बल्लाकेमाः नत्रसा गथे यानाः धर्म प्रचार यायेगु, धर्म यायेगु। थथे याये मजिउ धइगु बुद्ध धर्मया उद्देश्य खः।
भगवान् बुद्धयागु ज्ञानयात धाथें थुइका वनेगु खःसा पञ्चशील पालन यानाः अष्टाङ्गिक मार्गय् पलाः तयाः ३८ मंगल सूत्र दुने च्वनाः ज्या यात धाःसा मनुष्य जीवनया सार "नमोतस्स ... भगवतो अरहतो सम्मासम्बुद्धस्स"या महिमा, शरण ब्राम्हणं बुद्ध भगवान्यागु ज्ञान थुइकू थें झीपिं नं बुद्ध धर्मया अंशियार जुइत बांलाःपिं जुइ फइ। भवतु सब्ब मंगल ।

More Stories Like this