न्हिं १० घौ जक च्याके खनीगु मत

देशय् न्हूगु सरकार वःकुन्हु हे न्हिं १२ घौ जुयाच्वंगु लोडशेडिंगया ई अप्वयेकाः न्हिं १४ घौ याःगु दु। विद्युत विश्लेषकतय्सं थ्व ई अझ निघौ थपे जुयाः न्हिं १६ घौ तक जुइफु धकाः अनुमान यानाच्वंगु दु। अथे जुल धाःसा नेपाली जनतां न्हिं ८ घौ जक मत च्याके खनी। यदि राज्यपाखें न्हून्हूगु विद्युत उत्पादनया ज्या तत्काल मन्ह्याकल धाःसा मेगु छुं दँ लिपा न्हिं २० घौ तक नं लोडशेडिंग यायेमालीगु अवस्था वइगु अनुमानत प्रक्षेपण जुयाच्वंगु दु। व ई आधुनिक नेपाःया लागिं धाथें नं छगू भयावह ई जुइगु खँय् शंका मदु ।

नेपाः धमाधम असफल राष्ट्र जुइगु लँय् न्ह्याः वनाच्वंगु ख्याच्वः विदेशी विशेषज्ञतय्सं बीगु याः। नेपाःयात धाथें हे असफल राष्ट्र दयेकेगु ज्यायात आः जुयाच्वंगु लोडशेडिंगं तिबः बीगु निश्चित दु। विद्युत मदुगु कारणं यानाः देय्या आपालं उद्योग व्यवसाय बन्द जुइधुंकूगु दुसा चले जुयाच्वंगु व्यवसाय नं न्ह्याके थाकुगु अवस्थाय् लानाच्वंगु दु। उद्योग व्यवसाय बन्द जुयाच्वंगु खँ छुं ई न्ह्यः तक चर्चाया विषय जुयाच्वंगु खःसां आः थुकिया बारे सुनां नं न्ववायेगु तकं बन्द याना हयेधुंकूगु दु। थ्व मेगु ग्यानापुगु पक्ष खः। न्हियान्हिथंया जीवन हे कष्टकर जुइक म्वायेत बाध्य जुयाच्वंपिं जनतायाके कन्हय् राष्ट्रवादी भावना नं बुलुहुँ मदया वनी। उमिसं थः म्वानाच्वनागु देशयात माया यायेगु त्वःता हइ। वास्तवय् जनताया नुगलय् दना वइगु थज्याःगु नकारात्मक भावनां हे छुं नं मुलुकयात असफल राष्ट्र दयेकेत ग्वाहालि याइगु खः। लोड शेडिंगया थ्व गम्भीर पक्षयात राज्यपाखें आः तक नं ध्यान बिउगु खने मदुनि ।

More Stories Like this