खनाल सरकार गठन जुइ न्ह्यः हे क्वःथलेगु कुतः
येँ (सन्ध्या टाइम्स)/ताःहाकःगु अन्यौल लिपा प्रधानमन्त्री जुयादीम्ह झलनाथ खनालया सरकारयात गठन जुइ न्ह्यः हे क्वःथलेगु लागिं एमाले दुने कुतः शुरु जूगु खँ सूत्रं धाःगु दु। पार्टी अध्यक्ष झलनाथ खनाल व माओवादी अध्यक्ष प्रचण्ड दथुइ जूगु ७ बुँदे सम्झौतायात त्वहः दयेकाः एमाले दुनेया माधव-केपी गुटं खनाल सरकार हे क्वःथलेगु रणनीति दयेकूगु खँ धाःगु दु ।
म्हिगः च्वंगु पार्टीया स्थायी समितिया बैठकय् मेगु खँ छुं हे मल्हासे वहे गोप्य सम्झौता बारे विवाद जूगु खः। माधव नेपाल, केपी ओलीपिंसं उगु गोप्य सम्झौतायात त्रुटिपूर्ण खः धकाः घोषणा यायेमाः धइगु माग याःगु खः। सूत्रया कथं उमिसं उगु सम्झौताय् उल्लेख जुयाच्वंगु 'समावेशी लोकतन्त्र' धाःगु छु खः, सामन्तवादया समूल अन्त्य धाःगु छु खः धकाः अध्यक्ष खनालयात र्याखर्याख याःगु खः।
सूत्रया कथं म्हिगःया बैठकय् माधव-ओली गुटय् गृहमन्त्रीया रुपय् प्रस्तावित बिष्णु पौडेल नं समावेश जूवंगु खःसा थःत मन्त्री मदयेकल धकाः तम्वयाच्वंम्ह महासचिव ईश्वर पोखरेलं नं उगु हे गुटया पँ लिउगु खः। बिष्णु पौडेल, ईश्वर पोखरेलपिंसं छखे मन्त्री पदया दावी यायेगु व मेखे सम्झौताया विरोध नं यायेगु निखें त्यःगु बिचाः ज्वंगु खः ।
उखे माओवादीं धाःसा यदि एमालें उगु सम्झौतायात त्रुटिपूर्ण धकाः घोषणा याना हल धाःसा तुरुन्त हे समर्थन लित कायेगु जुइ धकाः धायेधुंकूगु दु। माओवादीं समर्थन लित काल धाःसा प्रधानमन्त्री खनालं तुरुन्त हे राजीनामा बीमाःगु अवस्था वइ ।
उगु ७ बुँदे सम्झौताय् माओवादी अडिग जूगु कारणं आः वहे सम्झौताय् प्रहार यानाः निगू दल दथुया गठबन्धन त्वाःथलेमाः धकाः एमालेया माधव-ओली पुचः अझ सक्रिय जुया वःगु खँ सूत्रं धाःगु दु ।
म्हिगः च्वंगु स्थायी समितिं उगु सम्झौतायात कयाः कडा रुपं विरोध याःसां अन्तिमय् धाःसा उगु सहमतिइ दुगु खँ छुं अस्पष्ट दुसा उकियात स्पष्ट यायां वनेगु धकाः नं सहमति दयेकूगु दु। आःयात थ्व सम्झौता निगू दलया दथुइ जक जूगु कारणं कन्हय् छुं जुयाः थ्व गठबन्धनय् मेमेगु दलत नं समावेश जूवल व उमित थुकिया ब्याख्या माल धाःसा अबलय् सम्झौताया ब्याख्यायात स्पष्ट याना वनेगु धकाः नं सहमति जूगु खँ धाःगु दु ।
