'गोप्य सम्झौता'या विरोध छाय्?

माओवादी व एमालेया शीर्ष नेतातय् दथुइ सरकार सञ्चालनया विषययात कयाः जुयाच्वंगु धाःगु ७ बुँदे गोप्य सम्झौतायात कयाः थीथी कथंया टिकाटिप्पणी जुयाच्वंगु खने दयाच्वंगु दु। थ्व वास्तवय् वर्तमान एमाले-एमाओवादी गठबन्धनयात मयःपिं व्यक्ति व शक्तितय्सं बियाच्वंगु द्वपं जक खः धइगु खँ उगु गोप्य सम्झौताया न्हय्गुलिं बुँदा ब्वनेबलय् प्रस्ट जू वइ। छाय्धाःसां उगु गोप्य धाःगु सम्झौताय् अज्याःगु छुं नं बुँदा दुथ्यानाच्वंगु मदु गुगुं मुलुकयात घात यायेगु ज्या याइ। न उकी देश मीगु खँ च्वयातःगु दु, न देशया छुं स्रोत साधन विदेशीया ल्हातय् लःल्हायेगु खँ उल्लेख जुयाच्वंगु दु। राष्ट्रियता बल्लाकेगु, देशया हित जुइगु ज्या यायेगु धकाः च्वयातःगु छुं नं कथंया दस्तावेजयात मात्र गोप्य याना तल धइगु आधारय् अस्वीकार यायेमाःगु छुं नं आवश्यकता मदु। उगु सम्झौताय् माओवादी लडाकुया सेना दयेकेगु खँ दु। थ्व ला कन्हय् गोप्य याना मतःसां नं पिहां हे वइगु खँ खः। उकियात कार्यान्वयन यायेगु लाकि मयायेगु धइगु खँय् सहलह ला जुइ हे तिनि। मात्र सरकारं जक धयां जीगु खँ व मखु। अथे हे पालंपाः सरकार चले यायेगु धइगु नं छुं अजूचायापुगु खँ मखु। सु सु दल मिले जुयाः बहुमत खाके फइ, उपिं मिलेचले जुयाः सरकार चले याना वन धाःसा उकी सुनां नं कपाः स्याके माःगु आवश्यकता मदु। बरु थ्व खँ खः कि थज्याःगु स्पष्ट रुपं हे पिहां वःसां नं सुनां हे विरोध याये म्वाःगु खँयात थ्व निगू दलतय्सं छाय् गोप्य याना तल? उकिया लिउने छु ग्याःचिकुं ज्या यात? थ्व बरु उमिसं धायेमाः। मखुसा छुं नं गठबन्धन निर्माण जुइत छगू आधार माः, उमिगु आधार राष्ट्रया पक्षय् दु ।

More Stories Like this