नेपाः अन्डर नाइन्टीन इलाइट कप क्रिकेटया फाइनलय्

थाइल्याण्डय् न्ह्यानाच्वंगु एसीसी अन्डर नाइन्टीन इलाइट कप क्रिकेट धेंधेंबल्लाय् नेपाः फाइनलय् थ्यंगु दु ।

बैङककया एसियन इन्सिच्युट अफ टेक्नोलोजी कासाख्यलय् थौं जूगु न्हापांगु सेमिफाइनल कासाय् नेपालं कतारयात खुगू विकेटं बुकाः फाइनल यात्रा क्वःछ्यूगु खः । न्हापलाक ब्याटिङ याःगु कतारं पीन्हय्गु ओभरय् फुक्क विकेटया क्षतिइ सच्छि व झिंस्वंगू रन जक दयेकूगु खः ।

सच्छि व झिंप्यंगू रनया लक्ष्य ज्वनाः ब्याटिङ याःगु नेपालं नीगू ओभरय् प्यंगू विकेटया क्षतिइ थःपिनिगु लक्ष्य पूवंकूगु खः । नेपाःया निंतिं नरेश बुढाऐरं अविजित दकले अप्वः पीछगू रन दयेकूगु खः । अथेहे स्वीखुगू रन दयेका सागर पुन आउट जूगु खः । फैजरुल रहमान खानं झिंगुंगू व प्रदिप ऐरीं झिंनिगू रन दयेकूगु खः ।

नेपाःया निंतिं राहुल कुमार विकं दकले अप्वः प्यंगू विकेट काःगु खः । अथेहे भुवन कार्कीं निगू व अविनाश कर्णं छगू विकेट काःगु खः । धेंधेंबल्लाया अवधिभर नेपाःया निंतिं राहुल कुमार विकं थःगु नामय् दकले अप्वः नीगू विकेटया रेकर्ड तःगु दु ।

धेंधेंबल्लाया दौरान कप्तान पृथु बास्कोटा घाःपाः जूगु दु । आः बास्कोटां स्ववाः तक कासा म्हिते मफइगु म्यानेजर बसन्तराज सत्यालं जानकारी ब्यूगु दु ।

थ्वसिवें न्ह्यः नेपाः पुचः बी पाखें विजेताया रुपय् सेमिफाइनल तक थ्यंगु खःसा कतार पुचः ए पाखें उपविजेता जुया लिपांगु प्यंगूलय् थ्यंगु खः ।

अथेहे थौं हे जूगु मेगू सेमिफाइनल कासाय् अफगानिस्तानं हङकङयात न्हय्गु विकेटं बुकाः लिपांगु निगू थाय्या निंतिं थःगु नां पक्का याःगु दु । फाइनल कासा वइगु विहीवाः नेपाः व अफगानिस्तान दथुइ जुइ ।

More Stories Like this