थनिंनिसें सुरु जुल वसन्त ऋतु
थौं श्रीपञ्चमी पर्व अथेधयागु विद्याया देवी सरस्वीतया पूजा-आराधना याना श्रीपाचमी हनाच्वंगु दु ।
श्रीपाचमीया झ्वलय् राष्ट्रपति डा. रामवरण यादवं थौं वसन्तपुरया त्रिभुवन मेमोरीयल संग्रहालय ग्वसाःग्वःगु विशेष ज्याभुवलय् बसन्त श्रवण यानादिल । विशेष समारोहलय् वसन्त ध्वनी श्रवण यायेत उपराष्ट्रपति परमानन्द झा, प्रधानमन्त्री झलनाथ खनाल, प्रधान्यायधिश रामप्रसाद श्रेष्ठ व सभामुख सुवास नेम्वाङ नं उपस्थिति जुयादीगु खः । श्रीपञ्चमीया लसताय् याःगु विशेष ज्याझ्वलय् थीथी सुरक्षा निकायया प्रमुखतय्गु नं उपस्थिति दुगु खः ।
हिन्दु धर्मालम्वीतय्सं सरस्वतिया देगलय् व सरस्वतीया प्रतीक सफुतिइ पुजा याना सरस्वती पुजा यायेगु याइ । थौं सुथंनिसें देय्न्यंकंया सरस्वतिद्यःया थाय् सरस्वति पुजा यायेत वःपिं ब्वनामितय्गु भीड जूगु दु । विद्या व सिर्जनाया देवी जूगुलिं विशेषयाना साहित्यकार, कलाकार, पत्रकार, शिक्षक व ब्वनामितय्सं थःथःगु कला-साधनाया ज्वलं सफू, च्वसा, वाद्ययन्त्रयात सरस्वतीया रुपय् पूजा याइ ।
थौंया दिं सरस्वति पुजाया भिं दिं जूगुलिं इहिपा यायेत नापं भिंगु, छुं नं ज्या यायेत साइत स्वयेम्वाःगु मान्यता दु । सूर्य उत्तरपाखे वना न्हि ताःहाकः जुइगु व वसन्त ऋतु सुरु जुइगु विश्वास नापं थौंया दिंयात 'वसन्त पञ्चमी' नं धायेगु याः ।
थौं सरस्वतीया पूजा याना विद्यारम्भ यातधाःसा सर्वसिद्धि प्राप्त जुइगु विश्वास दु । थौं इहिपा, कय्तापुजा, बाह्रा पिकायेगु व इहि यायेगु थें जाःगु सामाजिक व धार्मिक ज्या यायेत साइत स्वयेम्वाः । थौं मस्तय्त शिक्षारम्भ याकेगु नापं न्हाय् व न्हाय्पं प्वाः खंकेगु याइ ।
येँया स्वयम्भू, मैतीदेवी व गैरीधारास्थित नीलसरस्वती, यलया लेले नापं थीथी जिल्लाय् दुपिं सरस्वतीया देगलय् थौं सुथंनिसें पूजाआजा यायेत विशेष याना ब्वनामितय् भीड जुयाच्वंगु दु । सरस्वतीयात पुज्यागु न्हय्गु जाकि वां मथिक घुतकल धाःसा विद्या व बुद्धि अप्वइगु नापं नेतनाया ज्योति दइगु विश्वास दु ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
