७ बुँदे सम्झौताय् अझं दृढ
थौं माओवादी-एमाले शीर्ष नेतातय् बिस्कं बैठक
येँ (सन्ध्या टाइम्स)/न्हूगु सरकार गठन यायेगु झ्वलय् एमाले अध्यक्ष झलनाथ खनाल व माओवादी अध्यक्ष पुष्पकमल दाहाल प्रचण्ड दथुइ जूगु ७ बुँदे गोप्य सम्झौतायात कयाः एमाले व कांग्रेस पाखें विरोध जुयाच्वंगु इलय् लाक्क थौं प्रधानमन्त्री झलनाथ खनाल व माओवादी अध्यक्ष प्रचण्ड दथुइ जूगु वार्तां उगु ७ बुँदे सम्झौताय् थःपिं दृढ दु व सरकार वहे सम्झौता कथं न्ह्याः वनी धइगु खँय् सहमति जूगु दु ।
थौं सुथय् निगुलिं पार्टीया शीर्ष नेतातय् दथुइ बैठक च्वनाः उगु सहमति जूगु खः। बैठकं ७ बुँदे सहमतियात एमाले व कांग्रेसं विरोध यानाच्वंसां एमाले व माओवादीया शीर्ष नेतातय्सं धाःसा उकी सहमति व्यक्त याःगु खः ।
थौं थःपिनि दथुइ जूगु वार्ता लिपा संचारमाध्यमलिसे खँ ल्हासें एमाले व माओवादीया शीर्ष नेतातय्सं उगु ७ बुँदे सहमतियात सञ्चार माध्यमं गलत रुपं प्रचार याःगु द्वपं बियादिल ।
उगु ७ बुँदे सहमतिइ माओवादी लडाकुया बिस्कं फोर्स दयेकेगु, एमाले व माओवादीया शीर्ष नेतातय्सं पालंपाः सरकार चले यायेगु धइगु खँ दुथ्याः ।
सरकार गठन यायेगु लागिं मन्त्रालय इना कायेगु खँय् ल्वापु पिहां वयाच्वंगु बारे नं थौंया बैठकय् सहलह जूगु खँ धाःगु दु। माओवादीपाखें गृह मन्त्रालय दावी यानाच्वंगु दुसा एमालें उकी थः नेताया नां घोषणा यायेवं माओवादीं उकी विरोध याःगु खः। थुकिं यानाः म्हिगः प्रधानमन्त्री याकःचां जक सपथ ग्रहण यायेमाःगु अवस्था वया बिउगु खः। यदि एमालें म्हिगः नां घोषणा याःपिं मन्त्रीतय्त सपथ ग्रहण याकल धाःसा थःपिंसं सपथ ग्रहण ज्याझ्वः हे बहिष्कार यायेगु जुइ धकाः तकं माओवादीपाखें ख्याच्वः वयेवं म्हिगः एमाले मन्त्रीतय्त सपथ ग्रहण मयाकूगु खः।एमालें नां बिउपिं मन्त्रीतय्त म्हिगः सपथ ग्रहणय् वा धकाः सःते नापं धुंकूगु खः। तर माओवादीलिसे खँ मिले मजुइवं उमित हानं सपथ ग्रहणय् वये म्वाःल धकाः खबर छ्वःगु खँ सूत्रं धाःगु दु ।
रक्षा नं प्रधानमन्त्रीं हे काइगु
सरकार गठनया सवालय् न्हूगु मन्त्रिपरिषद्या खाका नं तयार याना तयेधुंकूगु खँ सूत्रं धाःगु दु। उगु खाका कथं प्रधानमन्त्री झलनाथ खनालं आःया निंतिं रक्षा मन्त्रालय नं थम्हं हे काइगु खँ दु। थ्व बाहेक एमाले स्थायी समितिया दुजः भरतमोहन अधिकारीयात उपप्रधान व अर्थ, माअवादी पोलिटब्युरो दुजः कृष्णबहादुर महरायात उपप्रधान व परराष्ट्र मन्त्रालय बीगु खँ दु। अथे हे एमालें विष्णु पौडेलयात गृह व गंगालाल तुलाधरयात शिक्षा मन्त्रालय बीगु निर्णय याःगु खः ।
