हानं मन्त्रालय भागबन्डाय् कचवं

एमलें बिउगु मन्त्रालयय् माओवादी आपत्ति

* भरतमोहन, विष्णु पौडेल व गंगालाल मन्त्री
* थौं ३ बजे सरकारपाखें सपथ ग्रहण

येँ (सन्ध्या टाइम्स)/निम्ह शीर्ष नेतातय् दथुइ लिखित सम्झैता हे यानाः गठन याःगु एमाले-माओवादी सरकार दुने नं मन्त्रालय बाँडफाँड सम्बन्धी खँयात कयाः कचवं पिहां वःगु दु। मन्त्रालय बाँडफाँड गय् यानाः यायेगु धकाः एमालें तयार याःगु खाकायात कयाः माओवादीं आपत्ति प्वंकूगु दुसा आः बाँडफाँड सम्बन्धी खँ मिले यायेत निगुलिं दलया शीर्षस्थ नेतातय् दथुइ वार्ता याइगु जूगु दु ।

मन्त्रालय बाँडफाँडयात कयाः थौं माओवादी व एमालेया शीर्ष नेतातय्गु दथुइ थौं जूगु वार्तां छुं निर्णय याये मफयेवं मन्त्रालय इनेगु भाला माओवादी अध्यक्ष प्रचण्ड व प्रधानमन्त्री अध्यक्ष झलनाथ खनालयात बिउगु खः। निगू दलं म्हिगः दयेकूगु मंकाः कार्यदलया बैठकय् उगु सहमति जूगु खः ।

थौं प्रधानमन्त्रीया सपथ ग्रहण न्ह्यः हे निम्ह नेतातय्सं मन्त्रालय इना कायेगु सवालय् सहमति याइगु खँ धाःगु दु। निगू दल दथुइ सहमति जुइ धुंकाः थौं हे चीधंगु मन्त्रिपरिषद् दयेकेगु खँ नं निगू दलया नेतातय्सं धाःगु दु।
एमाले संसदीय दलया ज्याकू सिंहदरवारय् जूगु उगु वार्ताय् न्हापाया सहमति कथं माओवादीयात गृह मन्त्रालय बीमाःगु खःसां एमालेया थौं सुथय् च्वंगु स्थायी समितिया बैठकं थःपिनिपाखें गृहमन्त्री जुइम्हेसिया नां सार्वजनिक यात धकाः माओवादी नेतातय्सं आपत्ति प्वंकूगु खः।
कार्यदलय् हे सहमति मजुइकं एमालें थःगु हे कथं मन्त्रीतय्गु नां सार्वजनिक याःगुलिं माओवादी नेतातय्सं आपत्ति प्वंकूगु खः ।

थौं न्हिछि हे माओवादी अध्यक्ष प्रचण्ड व एमाले अध्यक्ष खनाल दथुइ वार्ता जुइगु नाप नापं थःथःगु पार्टीया नेतातलिसे सहलह ब्याकाः थौं हे न्हापांगु चरणया मन्त्रिपरिषदया खँ क्वःछी धाःगु दु ।

एमालेया थौं सुथय् च्वंगु स्थायी समितिया बैठकं एमालेया नेतात भरतमोहन अधिकारी, बिष्णु पौडेल व गंगालाल तुलाधरयात मन्त्रिपरिषदय् छ्वयेगु निर्णय याःगु खः। केन्द्रीय ज्याकू बल्खुइ च्वंगु उगु बैठकं न्हापांगु चरणय् वय्कःपिं स्वम्हेसित मन्त्रिपरिषदय् दुथ्याकेगु नापं थौं हे प्रधानमन्त्री झलनाथ खनालया नापनापं वय्कः मन्त्रीतय्त नं सपथ ग्रहण याकेगु निर्णय नं याःगु खः ।

खनाल नेपाःया ३४ म्ह नापं गणतान्त्रिक नेपाःया स्वम्हम्ह प्रधानमन्त्री खः। खनालं थौं सनिलया स्वताः इलय् राष्ट्रपति डा. रामवरण यादवपाखें सपथ ग्रहण यानादीगु ज्याझ्वः दु ।

भरतमोहन अधिकारीयात उपप्रधान नापं अर्थ मन्त्रालय, विष्णु पौडेलयात गृह मन्त्रालय अले गंगालाल तुलाधरयात शिक्षा मन्त्रालयया जिम्मेवारी बीगु निर्णय एमालें याःगु दु। अधिकारी न्हापा नं उपप्रधान नापं अर्थमन्त्री जुयाः ज्या यायेधुंकूम्ह खःसा ओली नाप लिक्क लाःम्ह धयातःम्ह पार्टी सचिव पौडेल न्हापा माओवादी अध्यक्ष प्रचण्डया नेतृत्वय् सरकार दयेकूगु इलय् जलस्रोत मन्त्री जुयाः ज्या यायेधुंकूम्ह खः। धादिङ्गया तुलाधर पार्टीया वैकल्पिक पोलिटब्यूरो दुजः खः ।

प्रधानमन्त्री झलनाथ खनालयात चुनावय् बूपिं मन्त्री मदयेकेगु लागिं सभासद्तपाखें दवाव वयाच्वंगु दुसा वय्कलं फयांफछि चुनावय् बूपिंत मकायेगु हे नीति दयेकीगु खँ धाःगु दु। लिसें मन्त्रीतय् ल्याः नं २६ गू मन्त्रालय स्वयां अप्वः मयायेगु लागिं वय्कलं कुतः यानादीगु दु ।