'दक्ष मनूतय्गु चीधंगु मन्त्रीमण्डल'
सरकार गठन यायेत माओवादी व एमालेया वार्ता
येँ (सन्ध्या टाइम्स)/म्हिगः तिनि प्रधानमन्त्री निर्वाचित जुयादीम्ह एमाले अध्यक्ष झलनाथ खनालं आः सक्षम मनूत दुथ्याकाः चीधंगु मन्त्रिमण्डल दयेकेगु खँ धयादीगु दु। थौं सुथय् येँया डल्लुइ थःगु हे छेँय् भिंतुना बिउ वःपिंलिसे खँ ल्हासें वय्कलं थ्व खँ धयादीगु खः। सरकार गठन यायेत चुनावय् ग्वाहालि याःगु दलया नेतातलिसे सहलह ब्याकाः निर्णय यायेगु खँ नं वय्कलं कनादिल। थःगु सरकारया मुख्य एजेण्डा शान्ति व संविधान जुइगु खँ नं वय्कलं कनादिल। जःलाखःला देय् भारत व चीनलिसे स्वापू अझ बांलाका यंकेगु खँ नं वय्कलं प्वंकादिल ।
थ्वहे दथुइ आइतवाः सपथ ग्रहणया नितिं चीधंगु मन्त्रीमण्डल दयेकेगु बारे एमाले व माओवादीया ब्यागलं ब्यागलं बैठक थौं सुथय् च्वंगु दु। अथे हे थौं एमाले व माओवादीया शीर्ष नेतातय् दथुइ वार्ता याना मन्त्रालय बाँडफाँडया खँ क्वःछीगु खँ नं वय्कलं कनादिल। निगू दलया वार्ता लिपा हाकनं थःथःगु दलय् सहलह ब्याकेधुंकाः जक मन्त्रीत नियुक्ति यायेगु सवालय् खँ क्वःछी धाःगु दु। आःया अवस्थाय् मूल रुपं माओवादीयात उपप्रधानमन्त्री नापं रक्षा, गृह व अर्थ मध्ये छगू मन्त्रालय बीगु खँ धाःगु दु ।
