अन्ततः निकास लुल, वहे बांलात

देशय् संविधानसभाया चुनाव धुंकाःया स्वम्हम्ह प्रधानमन्त्री कथं म्हिगः एमालेया अध्यक्ष झलनाथ खनालयात ल्यःगु दु। प्यंगू तःधंगु पार्टीपाखें प्यम्ह हे उम्मेदवार कथं दनाच्वंगु इलय् नं अतिकं नाटकीय ढंगं भाजु खनालयात प्रधानमन्त्रीयात निर्वाचित यायेगु ज्या जूगु खः। वंगु ताः ई न्ह्यवंनिसें हे माओवादीं यदि थःपिंसं सरकार गठन याये मफुत धाःसा खनालयात समर्थन यायेगु धकाः खँ पिहां वयाच्वंगु खःसां म्हिगः अन्ततः उकियात पुष्टि नं यानाः क्यनेगु ज्या जुल। बरु थुकिया लागिं माओवादी अध्यक्ष प्रचण्डं थःगु हे पार्टी दुने कडा विरोधया सामना याये मालसा सरकारया समीकरण दयेकेगु लागिं वय्कलं थःगु हे पार्टी दुनेया समीकरण स्यंकेगु तकया जोखिम कयादीगु दु। वय्कलं कयादीगु थ्व जोखिमयात न्हू नियुक्त जुयादीम्ह खनालं गुलि इज्जत तया बीगु खः, व ला लिपा हे जक सी दइ, अथे खःसां आःयात माओवादी अध्यक्ष प्रचण्डं कयादीगु थ्व जोखिमयात मेगु मखुसां देशय् न्हूम्ह प्रधानमन्त्री नियुक्त मजुयाः गुगु ताःहाकःगु अन्यौलया वातावरण ब्वलनाच्वंगु खः उकियात निकास बीगु लँपुइ छगू न्ह्यथनेबहःगु पलाः खः धायेफु। यद्यपि एमालेया नेता माधव नेपालयात प्रधानमन्त्री पदं राजीनामा बीमाः हानं एमालेया हे मेम्ह नेतायात प्रधानमन्त्रीया रुपय् नियुक्त यायेगु थ्व ज्या छुं औचित्यपूर्ण धाःसा मखु। नेपाःया राजनीति दलीय सिबें नं व्यक्तिगत जुजुं वनाच्वंगुया थ्व छगू बांमलाःगु दसु खः। खनालपाखें माधव नेपालं स्वयां फरक छुं ज्या जुइ धकाः आशा यायेगु थाय् मदु। पार्टीइ वय्कःया बांलाःगु पकड नं मदु। वय्कःया नियुक्ति निकास चूलाःगु ल्याखं हे जक सकारात्मक खः ।

More Stories Like this