भट्टराईपाखें बहिष्कारया ख्याच्वः
थौं प्यम्हं हे उम्मेदवारत बुइगु निश्चित
येँ (सन्ध्या टाइम्स)/थौं जुयाच्वंगु प्रधानमन्त्रीया चुनावय् उम्मेदवार ल्ययेगु सवालय् नेपाली कांग्रेस दुने ल्वापु पिहां वःगु दुसा उखे माओवादी दुने नं ल्वापुया सम्भावना तच्वया वःगु खँ सीदुगु दु। खास यानाः माओवादी अध्यक्ष प्रचण्डं यदि प्रधानमन्त्री चुनावय् थःपिं मत्यात धाःसा एमाले अध्यक्ष झलनाथ खनालयात समर्थन यायेगु धकाः पिने बियादीगु अभिव्यक्तियात कयाः पार्टी दुने कचवं पिहां वःगु खँ सूत्रं धाःगु दु ।
सूत्रया कथं झलनाथ खनालयात समर्थन यायेगु खँय् माओवादी दुनेया डा. बाबुराम भट्टराई व मोहन वैद्य निम्हं हे सहमत मदु। यदि अध्यक्ष प्रचण्डं यकःति रुपं खनालयात समर्थन यायेगु धकाः वन धकाः वैद्य व भट्टराई पक्षया सभासद्तय्सं चुनाव बहिष्कार यानाः पिहां वनेफुगु खँ नं धाःगु दु। वैद्य व भट्टराई पुचलं अध्यक्ष प्रचण्डयात थुकिया बारे अवगत समेत याकेधुंकूगु खँ नं सूत्रं धाःगु दु। माओवादी दुने भट्टराई व वैद्य निगुलिं पुचःया सभासद छथाय् तयेबलय् सछिम्ह स्वयां अप्वः खाः वइगु खँ नं सूत्रं धाःगु दु ।
थुकिं यानाः प्रचण्डं धाः थें आः खनालयात नं त्याके फइगु अवस्था मदया वंगु खँ धाःगु दु। उखे प्रचण्डयात समर्थन यायेगु धकाः आः तक एमालें नं निर्णय मयाःनि। एमाले व माओवादी निगुलिं पार्टीया उम्मेदवारत मैदानय् दुगु कारणं निम्हेस्यां निम्हेसितं समर्थन याये फइगु सम्भावना मदुगु खँ सूत्रतय्सं धाःगु दु ।
थ्व ल्याखं स्वयेबलय् थौं जुइगु चुनावय् प्यम्हं हे उम्मेदवारत हानं छक्वः न्हापा थें हे बुइगु प्रवल सम्भावना दुगु खँ नं विश्लेषकतय्सं धयाहःगु दु ।
चुनावया प्रक्रिया कथं थौं प्यम्हेसियां लागिं छक्वलं मतदान जुइ। थुकी थःथः सभासद्तय्सं थःथः उम्मेदवारतय्त मत बिउ वनी। मतदान खुल्ला जुइ। तर सुनां नं न्हापा थें तटस्थ च्वने दइ मखु। तर सभासद्यात जानकारी बियाः उपस्थित हे मजुइगु, बहिष्कार यायेगु व भोट स्यंकेगु अधिकार धाःसा फुक्कं सभासदयात दु। थौं १ बजेनिसें चुनाव प्रक्रिया न्ह्याइ ।
