ख्वपय् न्ह्यानाच्वंगु स्वस्थानी धलं

कृष्ण

दँय्दसं थें थुगुसी नं वंगु छ्याला पुन्हिकुन्हुनिसें ख्वपया हनुमानघाट ख्वँह्रेय् स्वस्थानी ब्रत न्ह्यानाच्वंगु दु। सुथय् न्हापां हनुमानघाटया त्रिवेणीइ म्वःल्हुयाः लिक्क दयेकातःगु जज्ञय् धलं दनेगु अन ब्रत च्वनाच्वंपिनि लच्छियंकंया नियमित दिनचर्या जुयाच्वंगु दु। थुगुसी च्याम्ह मिजंत नापं नीस्वम्ह स्वस्थानी ब्रत च्वंपिं थ्यनेधुंकूगु दु। थ्व थासय् सक्वया साली नदी स्वयां न्ह्यःनिसें हे धलं दनेगु चलन दु धाइ। थुगु थासय् न्हापा आपालं श्रद्धालु भक्तजनपिं ब्रत च्वं वइगु खःसां आः थीथी कारणं यानाः धलं दनीपिं मनूतय् ल्याः पाः जुयाच्वंगु खँ स्वस्थानी ब्रत सेवा समितिं धाःगु दु ।

खास यानाः थन म्वः ल्हुइगु निंतिं लः सफा मजूगु व च्वनेगु वातावरण मदुगुलिं धलं दनीपिं मनूत पाः जुयाच्वंगु खँ स्थानीय मनूतय्सं धायेगु याः। ख्वप नगरं वइगु निकास हे तप्यंक खुसिइ लाका तःगुलिं खुसि तसकं फोहर जुयाः लः बाः मवसे धः बाः वयाच्वंगुलिं हे धलं दनीपिं पाः जूगुया मू कारण खः धइगु उमिगु धापू दु। आः अस्थायी कथं अन बुया वइगु लः जक छ्यलेगु यानाः धःपाखें वइगु लः च्वय् हे पनेगु ल्याखं अस्थायी बाँध दयेकातःगु दु। तर धलं दनीपिंत उकिं नं गन्ध वयेकीगु धाःसा म्हो जुयाच्वंगु मदु ।

'ख्वप नगरपालिकायात बारम्बार इनाप यानाःलि अन डोजर यंकाः धः म्हुइगु व धःया लः मेखेर छ्वयाः पुखू थें दयेकाः बल्ल तल्ल लः मुंकाः म्वः ल्हुइ जीकेत स्वःगु खः। अथे खःसां लः हे मन्ह्याइगु थासय् म्वः ल्हुइमाःगु अवस्थाय् गुलि लः सफा जुइगु खः अथें हे सीदु।' छम्ह धलं दनेत वयाच्वंम्ह मिसां कन ।

बाःछि नीन्हु तक अज्याःगु हे लखय् जलसमाधि कयाः थःपिनि धलं दनेगु ज्या न्ह्याये धुंकूगु व आः बाःछि तक थीथी थासय् भ्रमण यायेगु ज्या न्ह्यायेत्यंगु नं वय्कलं कनादिल। स्वस्थानी धलं दनेगु झ्वलय् माघ २० गते बिहिवाः कुन्हु ख्वँह्रे धलं दनाच्वंपिं मिसा मिजं फुक्कं तिलमाधवनारायण द्यः टौमढी जुयाः बंशगोपाल तक देश परिक्रमा यायेगु ज्या पूवंगु दु। आः आइतवाः तिलमाधवनारायण टौमढीइ व लाय्कुली तलेजुथाय् थुम्ह स्वस्थानी द्यः नापं स्वस्थानी धलं दनीपिंत परिक्रमा याकीगु ज्याझ्वः दु ।

वइगु माघ २५ गते श्रीपञ्चमीकुन्हु विशेष न्हि लाकाः उमित तिलमाधवनारायण जुयाः ख्वपया वडा नं.�१ लाःगु वाखुपतिनारायण द्यःया दर्शन भ्रमणय् यंकीगु जुयाच्वंगु दु। अथेहे माघ २७ गते कुन्हु तिलमाधवनारायण टौमढी वनाः वयां लिपा पन्तिइ प्रस्थान याइगु ज्याझ्वः दु। थथे थीथी थासय् भ्रमण वनेगु चलन दँय्दसं हे न्ह्याइगु खः। फागुन १ गते कुन्हु तिलमाधवनारायण जुयाः पशुपतिनाथ व ताम्रेश्वर महादेवया दर्शन याकाः लित हइगु ज्याझ्वः दु। अथेहे स्वस्थानी ब्रत सेवा समितिं बिउगु जानकारी कथं फागुन ३ गते कुन्हु तिलमाधवनारायण जुयाः ख्वपया उत्तरी लागाय् लाःगु चांगुनारायण द्यइके ब्वना यंकी। थथे तापाक वनेगु इलय् नं ब्रत च्वंपिं मिजं मिसा सकसिनं लाकां न्ह्याये मजिउगु जक मखु लाकांया नां तकं काये मजिउ धइगु धापू दु। वयां सातिकुन्हु नं तिलमाधवनारायण जुयाः चांगुखेल व चण्डेश्वरीया दर्शन याकाः स्वस्थानी धलं दंपिंत लित ब्वना हइ। माघ ५ गते कुन्हु देश परिक्रमा यायेगु धकाः ख्वप नगर चाःहिकी। दकलय् लिपा फागुन ६ गते सक्वः पुन्हि कुन्हु टौमढीया हे उगु तिलमाधवनारायण द्यइके यंकाः अनं लाय्कुली वनाः द्यः लित हयेगु इलय् ख्वपया चासुख्यः जुयाः लिहां वयेवं ब्रत क्वचाइ ।

थुकथं ख्वपय् न्ह्यानाच्वंगु स्वस्थानी ब्रत थीथी थासय् चाःहिलेधुंकाः क्वचाइगु खः। तर न्हिया न्हिथं हे ख्वँह्रं पिहां वयेवं टौमढीइ च्वंगु हाम्वः नारायणद्यः अर्थात् तीलमाधननारायण द्यःयाथाय् धाःसा छक्वः प्रवेश जुइमाःगु चलन दु। थथे ख्वपया स्वस्थानी ब्रत व टौमढीया हाम्वः नारायणया उलि हे सतीगु स्वापू दु धइगु थुकिं नं प्रमाणित जुयाच्वंगु दु ।

More Stories Like this