खनालयात समर्थन मयायेत सुझाव

प्रधानमन्त्री चुनावया निंतिं थौं नां दर्ता याइगु

येँ (सन्ध्या टाइम्स)/प्रधानमन्त्री चुनावय् एमालेया अध्यक्ष झलनाथ खनालयात समर्थन यात धाःसा एकीकृत माओवादी सिधइ धकाः चिचीधंगु खुगू दलया नेतातय्सं ख्याच्वः बिउगु दु। थौं सुथय् माओवादी संसदीय दलया ज्याकू सिंहदरवारय् जूगु सहलह ज्याझ्वलय् चिचीधंगु खुगू दलया नेतातय्सं अज्याःगु ख्याच्वः बिउगु खः ।

सहलहया झ्वलय् चिचीधंगु दलया नेतातय्सं एमाले अध्यक्ष झलनाथ खनालं न्हापा नं झंगः लायेधुंकूगु नापं वय्कः थःगु अडान धइगु हे मदुम्ह नेता जूगुलिं वय्कःयात माओवादीं समर्थन याये मजिउ धकाः सुझाब बियागु खँ नेपाः राष्ट्रिय पार्टीया अध्यक्ष डा. केशवमान शाक्यं 'सन्ध्या टाइम्स' यात कनादिल। वय्कलं यदि माओवादीं झलनाथयात समर्थन यात धाःसा माओवादीलिसे थःपिनि सहकार्य त्वाःदली धकाः तकं धयागु खँ नं कनादिल।
माओवादीं उम्मेदवार बीगु अवस्थाय् माओवादीयात हे समर्थन यायेगु जुइ धयादिसें थौंया सहलह ज्याझ्वलय् ब्वति काःपिं अप्वः नेतातय्सं खनालयात समर्थन यायेगु सिबें मधेसवादी दलतनाप जानाः माओवादीं सरकार दयेकेमाः, मखुसा प्रतिपक्षय् च्वनेगु हे पाय्छि धकाः सुझाव बिउगु खः ।

सहलह ज्याझ्वलय् एकीकृत माओवादी, माले समाजवादी, नेपाः राष्ट्रिय पार्टी, नेपाली जनता दल, नेपाल सद्भावना पार्टी आनन्दीदेवी, नेकपा (एकीकृत) व राष्ट्रिय जनमुक्ति पार्टीया नेतातय्सं ब्वति काःगु खः। अथे हे सहलह लिपा संचारकर्मीलिसे खँल्हासें नेकपा (माले) समाजवादी संसदीय दलया नेता यदुवंश झां शान्ति व संविधानया पूमवनाच्वंगु ज्या पूवंकेगु निंतिं माओवादी नेतृत्वय् सरकार दयेकेमाःगु जुयाः हे थःपिंसं समर्थन यायेगु सहमति जूगु खः धयादिल ।

एकीकृत माओवादीं चिचीधंगु दलया नेतातलिसे सहलह ब्याकेधुंकाः थौं हे मधेसी जनअधिकार फोरमया अध्यक्ष उपेन्द्र यादवलिसे नं सहलह ब्याकूगु दु। उकी माओवादीया नेतातय्सं प्रधानमन्त्री निर्वाचनय् थःपिनि उम्मेदवारयात समर्थन यायेत इनाप याःगु खःसा लिसलय् फोरम अध्यक्ष यादवं मेधेसी मोर्चाया बैठक च्वनाः जक निर्णय यायेगु जुइ धयादीगु खँ सीदुगु दु ।

एकीकृत माओवादी म्हिगः च्वंगु बैठकं प्रधानमन्त्री चुनावय् पार्टी अध्यक्ष प्रचण्डयात हे उम्मेदवार दयेकेगु निर्णय याःगु खः। संसदय् थौं प्रधानमन्त्रीया नितिं उम्मेदवारी दर्ता याइगु तिथि क्वःछिनातःगु दुसा कन्हय् न्हापांगु चरणया चुनाव याइ। कन्हय् सुनां नं बहुमत हये मफुत धाःसा माघ २२ गते हाकनं फुक्क उम्मेदवारतय् दथुइ निक्वःगु चरणया चुनाव याइ। यदि उकिं नं सुनां नं बहुमत हये मफुत धाःसा २२ गते दकलय् अप्वः मत हःपिं निम्ह उम्मेदवारतय् दथुइ जक मतदान याइ। चुनावया बारे आः न्हू दयेकूगु नियमावलीइ थ्व न्हूगु व्यवस्था यानातःगु खः। चुनाव त्याकेत धाःसा बहुमत हे माः ।