भ्याट छले याइपिं व्यापारीयात कारवाही
भ्याटया नकली बिल दयेकाः कारोवार यानाच्वंपिं थीथी व्यापारीतय्त सरकारं ज्वनेगु शुरु याःगु दु। व्यापारीतय्सं अनिवार्य रुपं भ्याट बिल दयेकाः ज्या यायेमाः धकाः कडाई याना तःगु खःसां व्यापारीतय्सं उकियात पालना याना थें क्यनेगु लागिं नकली बिल दयेकाः ग्राहकयात बिया छ्वयेगु व अःखतं अज्याःगु बिलपाखें लबः कायेगु ज्या जक यानाच्वंगु खः। थुकिं यानाः जुयाच्वंगु अर्बौं तकाया राजश्व चुहावटं देय्यात आपालं नोक्सान यानाच्वंगु खँ सकस्यां सिउगु हे खत। आः अज्याःपिं व्यापारीतय्त कारवाही यानाः बांलाःगु ज्या शुरु याःगु दु ।
नेपालय् भ्रष्टाचार पनेगु धइगु अःपुगु ज्या मखु। छाय्धाःसां भ्रष्टाचारं थन व्यापारय् जक मखु राजनीतिइ तकं बांमलाक हा कायेधुंकूगु दु। आः ज्वंपिं व्यापारीतय् लिउने नं अज्याःगु हे राजनीतिक शक्ति च्वनाच्वंगु दयेमाः। उकिं उमित कारवाही यायेगु पलाः न्ह्याके सातकि हे कारवाहीयात दथुइ हे दिकेगु लागिं राजनीतिक दवाव वइगु नं उलि हे सम्भावना दु। राजश्वया कर्मचारीतय्सं अज्याःगु दवावयात गुलि फये फइगु खः, व स्वये मानिगु विषय तिनि। छाय्धाःसां भन्सार आदि थेंज्याःगु थासय् वनाच्वंपिं कर्मचारी नं राजनीतिक दलया नेतातय् कृपा कयाः हे अन थ्यंपिं जुयाच्वनी। गुमिसं थःत अन छ्वया हःगु खः उमिगु आदेश पालना मयायेगु हिम्मत उमिसं याये फइ मखु। उकिं थज्याःगु गुलिखे मामिलाय् कर्मचारी थः हे संलग्न जुयाच्वंगु दइ। कारवाही धाःसा व्यापारी याकःचित जक जुइ। न्ह्यागुसां कारवाही न्ह्याकूगु बांलाः, उकियात अझ तब्या याना यंकूसा धाथें हे भ्रष्टाचार पने फइगु खइ ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
