माघ महात्म्य

लव कर्माचार्य

दछिया छक्वः वइगु झिंनिला मध्ये माघ महिनाया तःधंगु महत्व दु। मेमेगु महिना थें माघ महिनायात अथें फुका छ्वइ मखु। थ्व महिनाय् मनूतय्सं थीथी धार्मिक, सांस्कृतिक ज्याखँत याइसा थ्व महिना न्यंकं थीथी थासय् मेला आदि नं जुयाच्वंगु दइ ।

माघ महिनाय् हेमन्त ऋतु क्वचायाः शिशिर ऋतु शुरु जुयाच्वंगु दइ। माघया न्हापांगु न्हि अर्थात संल्हूयात नेवाःतय्सं घ्यःचाकु संल्हू धकाः व खय्तय्सं माघे संक्रान्ति धकाः विशेष रुपं माने याइगुलिं हे सी दु कि माघया महत्व बिस्कं दु। थ्व सखे मघा नक्षत्रय् लाःगु महिना जुयाः थुकियात माघ महिना धाःगु जुइमाः ।

थ्व महिनाया न्हापांगु न्हि निसें हे सूर्यं नं थःगु गति हिली। उकिं खगोलशास्त्र कथं थुकिया महत्व दु। मौसमया खँ ल्हायेगु खःसां नं माघं चिकुइगु कम जुइगु शुरु जुइ। थुबलय्निसें चा चीहाकः जुयाः न्हि ताःहाकः जुया वनी। उकिं नं थुकिया महत्व दु। खतुं यःमरि पुन्हिनिसें हे यःमरिया च्वका ति न्हि ताःहाकः जुया वनी धाइगु विश्वास दु ।

माघं छक्वः वा वये हे माः धाइ। माघं वःगु वा स्वयाः मेगु दँया वर्षाय् गुलि वा वइ धाये फइ धइगु नं विश्वास दु।
नेपाःमितय्सं माघ लछि थीथी कथंया मेला, जात्रा, पर्व आदि नं न्यायेकाच्वंगु दइ। पन्तिइ स्वदँय् छक्वः लछियंकं मेला जुइ। मकर मेलाया नामं नांजाःगु थ्व मेला नं स्वदँय् छक्वः माघ लछि हे न्यायेकीगु खः। थौंकन्हय् रिडि क्षेत्रय् मेला जुयाच्वंगु दु। उखे येँया सक्वय् थ्वहे माघ लछि साली नदिइ मेला जुयाच्वनी। अन लछियंकं कठोर अप्सं च्वनेगु ज्या जुइगु खः। माघ लछि सुथय् सुथय् खुसिइ वनाः म्वःल्हुइ धुंकाः शंख पुयाः माघ हालाः लिहां वयेगु ज्या याइ। थीथी भजनछेँय् थ्व इलय् माघ महिनाया महात्म्य कनाः भजन जुयाच्वनी। थ्व इलय् छेँय्छेँय् श्री स्वस्थानीया बाखं कनेगु याइ। थ्वहे इलय् श्रीपंचमि, भिं एकादशि थेंज्याःगु पर्व नं लाइ। लिसें ब्याहा, बिया छ्वयेगु, कय्तापुजा आदिया साइत नं माघ महिनाय् यक्व हे लाः वः ।

More Stories Like this