प्रधानमन्त्रीया नितिं थःथःगु तयारी

थौं उम्मेदवार दर्ता, कन्हय् चुनाव

येँ (झीगु स्वनिगः)

एकीकृत माओवादीं पार्टीया नायः पुष्पकमल दाहाल प्रचण्डयात प्रधानमन्त्रीया उम्मेदवार यायेगु धकाः खँ क्वःछ्यूगु दु । माओवादीया म्हिगः मंगलवाः च्वंगु स्थायी समितिया मुँज्यां अथे खँ क्वःछ्यूगु खः । प्रचण्डयात प्रधानमन्त्री दयेकेगु नितिं पार्टीया बरिष्ठ न्वकु मोहन बैद्य किरणं प्रस्ताव यानादीगु खःसा मेम्ह न्वकु डा. बाबुराम भट्राई नं समर्थन यानादीगु खः । थौं माओवादीया नायः प्रचण्डयात हे प्रधानमन्त्रीया उम्मेदवार दर्ता याइगु जूगु दु । अथे हे व्यवस्थापिका संसदय् कन्हय् २० गते प्रमया नितिं चुनाव याइगु जूगु दु ।

उम्मेदवारयात कयाः कांग्रेसय् विवाद

येँ (झीगु स्वनिगः)

कन्हय् उम्मेदवार दर्ता यायेगु इलय् प्रधानमन्त्रीया उम्मेदवार सु यायेगु धैगु खँय् नेपाली कांग्रेसय् विवाद ब्वलंगु दु । पार्टीया सभापति सुशील कोइरालां रामचन्द्र पौडेलयात हे उम्मेदवार यायेगु धकाः धयाच्वंगु दुसा वरिष्ठ नेता शेरबहादुर देउवा पक्षधरया नेतातय्सं धाःसा केन्द्रीय कमिटीया मुँज्या च्वना देउवायात उम्मेदवार यायेमाः धकाः अडान तयाच्वंगु दु ।

एमालेपाखें झलनाथ उम्मेदवार

येँ (झीगु स्वनिगः)

कन्हय् विहिवाः जुइगु प्रधानमन्त्रीया चुनावया नितिं नेकपा (एमालें) नायः झलनाथ खनालयात उम्मेदवार दयेकेगु धकाः औपचारिक रुपं निर्णय याःगु दु । म्हिगः मंगलवाः च्वंगु एमालेया केन्द्रीय कमिटीया मुँज्यां उगु कथं खनालयात उम्मेदवार दयेकेगु निर्णय याःगु खः । केपी शर्मा ओलीं खनालयात प्रधानमन्त्रीया उम्मेदवार यायेगु धकाः प्रस्ताव तयादीगु खःसा माधवकुमार नेपालं समर्थन यानादीगु खः । एमालें थःपिनिगु आधिकारीक उम्मेदवार घोषणा याःसां नं अन्तिम इलय् तक नं सहमतिया नितिं कुतः यायेगु धकाः तकं निर्णय याःगु दु ।