प्रचण्डयात बैद्य व भट्टराईया सर्त
येँ (सन्ध्या टाइम्स)/स्वंगू दलया नेतातय् दथुइ न्हूगु मंकाः सरकार दयेकेगु सवालय् सहमति जुइ मफयेवं दलतय्सं थःथःगु हे कथं तयारी यानाहःगु दु। स्वंगू हे दलं थःथःपिनिगु नेतृत्वय् सरकार दयेकेमाः धकाः अडान यथावत तयेवं अन्ततः सहमति जुइ मफयाः थःथःगु हे कथं तयारीइ वंगु खः ।
थ्व हे झ्वलय् एकीकृत माओवादीया अध्यक्ष प्रचण्डयात उगु पार्टीया न्वकुपिं मोहन बैद्य किरण व डा. बाबुराम भट्टराईं सर्त तयादीगु दु। स्रोतं बिउगु जानकारी कथं निम्ह हे उपाध्यक्षपिन्सं अध्यक्ष प्रचण्डयात प्रधानमन्त्रीया उम्मेदवारया नितिं समर्थन यायेगु तर चुनाव जुइ धुंकाः न्हापा थें उम्मेदवारी लित मकायेगु नापं एमालेयात समर्थन मयायेगु बरु प्रतिपक्षय् च्वनेगु विषयसं सहमति जुइमाः धकाः सर्त तयादीगु खः। प्रधानमन्त्रीया चुनाव जुइ धुंकाः नं हाकनं एमालेया अध्यक्ष झलनाथ खनालयात समर्थन याइ धकाः शंका यानाः अथे निम्ह हे उपाध्यक्षतय्सं सर्त तयादीगु खः ।
एकीकृत माओवादीं न्हापा नं प्रधानमन्त्रीया उम्मेदवार संसदीय दलया नेताया ल्याखं प्रचण्डयात ल्यःगु जुयाः थुगुसी नं वय्कःयात हे ल्यइ धकाः माओवादीया छम्ह नेतां धयादीगु दु ।
प्रधानमन्त्रीया चुनाव वइगु २० गते यायेगु नापं १९ गते प्रधानमन्त्रीया उम्मेदवारी दर्ता यायेगु अनंलिपा लगातार २२ व २३ गते चुनाव यायेगु धकाः व्यवस्थापिका संसदं न्हापा हे क्वःछिनातये धुंकूगु दु ।
