पाःलाःद्यः

शीला साय्मि

पाःलाःद्यःयाथाय् पूजा याःवनीपिनिगु भीड शनिवाः कुन्हु धाःसा अप्वः दयाच्वनी। खतुं मंगलवाः नं फाट्टफुट्ट भक्तजनत खने दइगु जूसां मेमेगु बारय् धाःसा सुन्य हे जुयाच्वनी ।

न छेँ न देगः। नितँजाःगु द्यःछेँय् निम्ह हे बिस्कं बिस्कं द्यःपिं बिज्यानाच्वंगु शायद तेबाहालय् हे जक दु जुइ। संकटाया नामं प्रख्यात जुयाच्वंम्ह पाःलाःद्यः दर्शन याः वन धाःसा छ्यं छगः व ल्हाः निपा हे जक खंके फइ। जवगु ल्हातय् खड्ग व खवगु ल्हातय् पलेस्वां ज्वनाबिज्याःम्ह वसपोलया म्ह धाःसा कापतं त्वपुयातःगु दु। थुकिया कारण सार्वजनिक मजूगु जूसां नं छगू अजूचायापुगु रहस्य धाःसा पक्का नं थुकी दुसुनाच्वंगु दयेमाः ।

शनिवाः पतिकं थ्व पाःलाःद्यःयाथाय् म्वःम्वः मनूत देइके वयेगु याः। न्हूपिं मनूतय्सं स्वइबलय् ला गुगुं नं तःधंगु जात्रा वाय् पर्व जकं मखु ला धइथें नं च्वनेफु। सुथसिया प्यताः इलंनिसें हे भक्तजनपिं पूजा यायेत लाइन च्वनेधुंकी। थुम्ह द्यःयाथाय् सुथसिया झिताः ईतकं उलि हे भीड जुयाच्वनी। झिताः ई लिपा धाःसा भीड सालुया वनीगु जूसां नं बहनी ८/९ बजे द्यः पूजा याः वइपिं हानं उलि हे दयाच्वनी ।

थथे छाय् भीड जुल धइगु खँय् जुजुपिं व ततःधंपिं मनूत दर्शन याः वइगु थाय् जुयाः व टेलिभिजनय् नं अप्वः मात्राय् खने दइगु जुयाः नं देय्न्यंकं प्रचार जुयाच्वंगु खँ स्थानीय रमेश बज्राचार्यं कनादिल। अथे हे मनूत दशा मभिन कि पाःलाःद्यः पूजा याः वइगु चलन जुयाः थौंकन्हय् जोशीतय्सं हे मनूतय्त पाःलाःद्यः पुज्या धकाः छ्वयाहइगु जुयाच्वन। न्हापा न्हापा थथे भीड मदुसां झिदँ झिंनिदँ न्ह्यवंनिसें यक्व हे भीड जूगु खँ नं भाजु बज्राचार्यं कनादिल ।

ला, ख्यें समय्बजि तयाः पुज्यायेमाःम्ह बौद्ध परम्पराया द्यः खःसां थौंकन्हय् धाःसा पाःलाःद्यःयात ख्येंया पलेसा नैक्याः, जाकिया थासय् हाम्वः, तछ्व छायेगु चलन नं जुयाच्वंगु दु। थुकियात आः हे वाःचायेके मफुत धाःसा लिपा द्यः हे हिन्दूकरण जुया वनीगु सम्भावना दुगु खँ वय्कलं कनादी ।

देइके वइपिं धाःसा ल्हातय् पूजा डोला छगः ज्वनाः निघौनिसें प्यघौ तक नं लाइनय् हे च्वनाः दर्शन यानाः जक हे वनी। न ख्वला न खड्ग गुता बीबः, नैक्याःग्वः, क्वखा, झल्लर कापः तक नं तयाः स्वानं त्वपुयाः झःझः धायेका हःगु पूजा (डोला) य् दुने स्वत धाःसा जाकि छगः तक नं मदुगु द्यः पाःलाः प्रदिप बज्राचार्यं कनादिल। द्यः पूजा यायेत मदयेक मगाःगु जाकि हे खः। बौद्ध धर्मकथं दश क्रोध द्यःपिं मध्ये छम्ह पद्मान्तक क्रोध राजया रुपय् पाःलाःद्यःयात कयातःगु दु। ज्वंसा कथं प्रज्ञा व उपाय, कमल व खड्ग खः। नक्षत्र, नवग्रह शान्त यायेया निंतिं बौद्ध तन्त्र साधन यानाः दयेका तःम्ह द्यः क्रोध राज पाःलाःद्यः खः। सामान्य मनूतय्सं संकट मोचन यानाबिज्याःम्ह द्यः जुयाः संकटा धायेगु यानाच्वंगु दु। अथे हे साढे सातया दशा भिंके माल धाःसां नं पाःलाःद्यः हे पुज्यायेगु चलन दु ।

पूजाया विधि धायेबलय् आइतवाः हे मू दिन कथं कयातःगु खः। गुरुजुपिनि धापूकथं शनिवाः स्वयां नं आइतवाः पूजा यायेगु अप्वः भिं जुइ। पाःलाःद्यःयाथाय् पूजा याःवनीपिनिगु भीड शनिवाः कुन्हु धाःसा अप्वः दयाच्वनी। खतुं मंगलवाः नं फाट्टफुट्ट भक्तजनत खने दइगु जूसां मेमेगु बारय् धाःसा सुन्य हे जुयाच्वनी ।

बिदा दुगु दिं जुयाः नं जुइफु शनिवाः कुन्हु न्हिछिया २०००-२५०० तक नं मनूत पूजाया निंतिं वयाच्वंगु दइ। देइके वइपिं धाःसा नेवाःत स्वयां नं ब्रम्हू, क्षेत्रीत हे अप्वः दयाच्वनी। थनं अथे धकाः यकिन हे याये मफयेक देय्या कुं कुलामं मनूत द्यःया दर्शन यायेत वयाच्वंगु खनेदु। तसकं भीड जुसेंलि भीड नियन्त्रण यायेया निंतिं गुरुजुपिनि हे दाजुकिजापिंपाखें नीम्ह (करिब) दुजःपिं सहित ग्वाहालि पुचलं स्वयेगु यानाच्वंगु दु। लाइन व्यवस्थित यायेत द्यःया थाय् हुल याके मबीगु व आवश्यक जुल धाःसा द्यःयाथाय् दुने च्वनाः नं पूजा यानाच्वंगु दु। द्यःया थाय् वनेत बुराबुरिमचा व अशक्तपिं लाइनय् च्वने म्वाःगु नं व्यवस्था दु। अथे हे संकटा क्लबपाखें नं व्यवस्थापन जुयाच्वंगु दु। भीड नियन्त्रण यायेगु, लाइन व्वयस्थित यायेगु, सरसफाई यायेगु, गाडी व मोटरसाइकल पार्किङ्गया व्यवस्था यायेगु, लः त्वंकेगु व्यवस्था नापं हाल सालं हे निगू शौचालयया नं व्यवस्था यानातःगु खँ क्लबया सचिव अशोक बज्राचार्यं कनादीगु खः। थुकिया लिसें व्यवस्था बांलाःगुलिं ल्वापु व डिस्टर्व छुं हे मजूगु खँ नं वय्कलं कनादिल। भक्तजनतय् निंतिं वालय् २०/२५ जार लः निःशुल्क वितरण जुयाच्वंगु दु ।

शनिवाः कुन्हु छन्हु द्यःपाःलाः गुरुजुपिंत ला हम्मे हम्मे हे जुइगु जुयाच्वन। तच्वःगु निभाः, लिमलाः पहः व हल्ला जुइगु न्ह्यः नं मगाइगु जुयाः द्यःया कृपां थःपिं न्ह्याबलें स्वस्थ जुयाच्वनागु खँ नं पाःलाः गुरुजुं कनादिल। भक्तजन न्हूपिं जुल कि द्यः गन धइगु मसियाः अन्योलय् लाइगु, पुजा लित मकाःतले पियाच्वनीगु व ताउ बिक द्यःया दर्शन यानाच्वनीगु कारणं अप्वः हुल खने दइगु द्यःपाःलाःया धापू खः ।

शनिवाः देइके वइपिं धाःसा खस, ब्रम्हू व क्षेत्रीत जक हे
जुइ। नेवाःत जन्मन्हि व मेमेबलय् जक पात्र थनेत वयेगु याः। शनिवाःकुन्हु बाहेक न्हूगु दँ वैशाख १ गते, मोहनीया कूछि भ्वय्बलय् अप्वः भीड जूगु खँ पाःलाः गुरुजुं कनादिल। न्हापा मंगलराज जोशीं थःथाय् क्यं वइपिं दक्वसित पाःलाःद्यः पुज्याके हइगु जुयाः नं हुल यक्व जुयाच्वंगु खँ कनादिसें थौंकन्हय् वय्कः मदये धुंकूगु जूसां मनूतय् देइके वयेगु बानी जुइधुंकूगु कारणं नं हुल जूगु खँ वय्कलं कनादिल ।

साढे सातया दशा फायेकेगु निंतिं अप्वः मनूत वइगु जुयाः शनी जययाकोष्ठी नं उलि हे दु। छगू जपया निंतिं एक पाठ धकाः व्यक्तिया नां च्वयेगु याइ। जप सिधल कि हाकनं प्रसाद काः वइ। छवाः लिपा प्रसाद धकाः स्वां, सिन्हः, फलफुल व नैंक्याः द्वल्चाय् तयाः बिया छ्वयेमाः। शनिवाः कुन्हु जक देइके वःपिंसं छाइगु नैक्याः हे सत्या निसः ग्वः दु ।

पाःलाःद्यःया ख्वालय् चश्मा खनाः धाःसा सकलें अजू चाः। मनूतय् स्वयां न्ह्यः वसपोलं छाय् चश्मा तयाबिज्यात धइगु खँय् गुरुजुं वसपोलया दृष्टि चूलाके मजिउगु व क्रोध रुप जुयाः मिखा भचा मेमेपिं द्यःपिं थें शान्त खनेमदुगु खँ कनादिल ।

पाःलाःद्यःया क्वय् श्री पद्मपाणी लोकेश्वर (बुंगद्यः) बिराजमान जुयाच्वंगु दु। झिंनिदँया मेला जुइबलय् क्वदुुवालय् वनाः पाःलाःद्यः काः वने माःकथं पाःलाःद्यः व बुंगःद्यः नाप सम्बन्ध दु। पाःलाःद्यः शान्त रुपया बुंगद्यः नं खः धाइपिं दु ।

More Stories Like this