लाइसेन्स !

नर्मदेश्वर प्रधान

खँयाखँय्
फोनय्। पासालिसे खँ जुइ। खँय्खँय् पासां धाइ, "स्व, बुरा जुयाया नं फाइदा दु। छं सिउ ला?" पासाया खँ त्वाल्हाये। न्ह्याके मबिया। पने। धाये, "छंगु खँ लिसे सहमति मदु। बुरा जुइगुया छु फाइदा दइ? अःखः बेफाइदा हे बेफाइदा जक जुइ। छंगु सोच गलत।" पासायात जिं न्वाये। पासा बुइ मखु। एकोहोरो जुइ। "खँ ला न्यँ। हावाय् खँ ल्हानाच्वनागु मखु। बुरा जुइगुया नं फाइदा दइ। छं विश्वास या।" पासाया खँ न्यने। नुगलय् मथिउ। म्वाः मदुगु जिद्दी यानाच्वं थें ताइ। हायेके मास्ते वइ। खँ स्वाये। "खः, खः। बुरा जुया वइगुया नं यक्व फाइदा दु। नये आपाः फइ मखु। खाना म्हं चाइ। फाइदा जुइ। कलाःलिसे कचकच यायगु म्हो जुइ। व नं फाइदा। मचाखाचात थःथःगु लँय् वनी। स्वयेमाली मखु। व नं फाइदा। सिद्ध बुद्ध जुइ दइ। कुंचाय् च्वनाः नये दइ। त्वने दइ। अले थ्वयात फाइदा मधासें छु धायेगु? मखुला?" जिं ब्यंग्य नकागु पासां वाःचायेकी। अले धाइ "बुरा जुइवं हे सिद्ध, सन्यास हे जुइमाः धइगु छु दु?" थौंकन्हय् ज्याथ जंक्व यायेधुकूपिं हे गुलि सक्रिय। फुर्तिबाज। बुरा। बैंसया खँ मखु। मनया खँ जुइ। गन मन ल्याय्म्ह जुइ। तन बुरा जुइ मखु। मन कमजोर जुल कि ल्याय्म्ह नं बुरा जुइ। बुरा धइगु मनया खँ। मनं मखंतले बुरा गबलें जुइ मखु ।

थौंकन्हय्। थथे धायेगु चलन दु। थथे धाइ। बुरातय्त ह्ययेकी। इमि मन तया बी। बुरापिं पत्याः जुइ। बुरा जूसां मन चंचल याना जुइ। थःत ल्याय्म्ह खंका जुइ। शायद पासां थ्वहे खँ धायेत्यंगु जुइमाः। तर जितः थ्व धापुती सहमति दइ मखु। बिमति जुइ। खँ शरीर वृद्ध जुइ। मन ल्याम्ह जुइफु। तर व वृद्धावस्थाया फाइदा मखु। भार जुइ। समस्या जुइ। वृद्धा अवस्थाय् थुकिं बिसंगति हया बी। असुन्तलन थना बी। असमंजस्यता लुइका बी। तनमन दथुइ द्वन्द्व सिर्जना जुइ। खलबल बेचैनीं त्वपुइ। वृद्धा अवस्थाय् शरीरलिसे नुगः नं वृद्ध जुजुं हे वनेमाः। वितृष्णा उन्मुख जुइ हे माः। सन्तुलित कथं म्वायेत मन जक चंचल जुयां मगा। शरीर नं उतिकं जीवन्त जुइमाः। छखेर शरीर गले जुइ। मेखेर मनं थःत चलायमान खंकां छु याये। थ्व स्थितिइ म्वायेगु मात्र भ्रम जुइ। भ्रान्ति खया बी। यथार्थया अनुभूति अन दइ मखु। पासायात हानं जिं तर्क प्वंके। "थःगु वृद्धा अवस्थाय् मनं जक जवान तायेकां छु याये। मेपिंसं नं अथे हे तायेका बिउसा खः।" ल्याय्म्हया अनुभूति मेपिनि लिधंसाय् जक सम्भव जुइ। थःगु मनं जक तायेकां मगाः। बुरा मनूतय्त गुलि ल्याय्म्ह खंकी? चान्स म्हो जुइ। "बुरातय्त खनी। छि ला ल्याय्म्ह तिनि। देवानन्द" धाइ। पम्प तइ। तर व्यवहारय् सुनानं ल्याय्म्ह खंकी मखु। पत्याः याइ मखु ।

पासा बुइ मखु। छंगु खँ निराशावादी। बुरा जुइगुया नं फाइदा दु। अनेक फाइदा। दसुत जिके दु। पासाया खँ न्यने। उत्सुक जुइ। धात्थें पासां वृद्धा अवस्थाया फाइदा छु खंकल जुइ। धात्थें खःसा सीकेमाः। वृद्धा अवस्थाय् उकिं राहत बी। उमेर वंकाः नं म्वानागुया सवा दइ ।

नैरास्यं नुगः क्वतुंके माली मखु। फाइदा छु छु खः। सीकेमाः। वृद्धा अवस्थाय् म्वायेत थुकिं जरुर हःपाः बी। वृद्धा अवस्थाया फाइदा छु छु खः। जिं ला उलि छु मखं। तर पासा आशावादी जुइ। फाइदात दु। वं दाबा याइ। जि नं वृद्ध जुजुं वनी। वैराग्यं थिया हइ। सुनां पत्याः याइ मखु। वृद्धा अवस्थाय् थःत थःगु हे भर दइ मखु। करपिनि छु भर? तर पासां वृद्धा अवस्थाया फाइदाया खँ ल्हाना हइ। न्हूगु खँ ताइ। विश्वास ला मदु। अय्नं पासां वृद्धा अवस्थाया फाइदा छु खंकल? सीके मास्ते वइ। धात्थे खःसा ला न्यने माली। थःत नं ज्या बी। ज्या ख्यले दइ। अले पासायात आग्रह याये, "वृद्धा अवस्थाया धात्थें फाइदा छु दु? कँ रे। जि नं बुढा जुजुं वनी। फाइदा छु? जिं नं सीके। मनोबल क्वातुके।" पासां कना हइ। "छन्हु कायलिसे जि मोटरसाइकलय्।
बहनी। भ्वजं लिहां वयाच्वनागु। लँय् लाइसेन्सया जाँच जुयाच्वन। कायया लाइसेन्स छेँय् लाइ। म्हय् दइ मखु। पुलिसं न्यनी। लाइसेन्स क्यनादिसँ। काय कातुमतु काइ। पुलिसं जिगु ख्वाः खनी। अहो बुरा मनू लिउने दु खनिं।" धाइ, "म्वाःल हुँ।" उबलय् जिं थः बुरा जूगुया फाइदा खंका। गर्व तायेका ।

मेगु घटना। काय मोटरसाइकलय्। जि लिउने। गल्तीं काय वान-वे लं वनी। पुलिसं खनी। दिकी। धाइ, "वान-वे लं छाय् वयागु? लाइसेन्स हि।" ख्याइ। लिउने जितः खनी। पुलिसं तुंक स्वइ। बुराम्ह खनी। "म्वाःल हुँ।" पुलिसं छूट बी। छूटया कारण जिगु वृद्धा अवस्था जुइ। का धा। वृद्धा अवस्थाया फाइदा दु लाकि मदु? वृद्धा अवस्थां लाइसेन्सया ज्या बी। समस्या वइबलय्। वयागु खँ न्यने। जिं वयात भचा न्याके। धाये "करूण रसया यात्राय् छंगु वृद्धा अवस्था सदाबहार लाइसेन्स जुइफु। तर रसराज श्रृंगार रसया यात्राय् वृद्धा अवस्था मिति फुगु लाइसेन्स जुइ। नवीकरण जुइगु गुकिया सम्भव हे दइ मखु। यात्रा अन न्ह्याके फइ मखु ।"

More Stories Like this