सरकार दयेकेत दलत व्यस्त
माधवया नेतृत्व फोरमयात स्वीकार
माओवादी सरकार सत्तां पिहां वयेधुंकाः न्हूगु सरकार गठनया लागिं राजनीतिक पार्टीतय् दथुइ संवाद जारी दनि । थौं नं थीथी राजनीतिक पार्टीया नेतातय् दथुइ सरकारया समीकरण तयार यायेगु लागिं थवंथवय् बैठक व मेगु पार्टीतलिसे वार्ता न्ह्यानाच्वंगु दु ।
सरकार गठनया लागिं कुतः जुयाच्वँच्वं हे म्हिगः माओवादी अध्यक्ष प्रचण्डं आः गठन जुइगु सरकारया नेतृत्व नं माओवादीं हे याइ धकाः न्ववायेवं सरकार गठनया कुतः यानाच्वंपिं मेपिं राजनीतिक पार्टीत सतर्क जूगु दु । सूत्रया कथं आः यदि राष्ट्रिय सहमतिया सरकार गठन जुल धाःसा उकिया नेतृत्व थःपिंसं यायेगु बिचाः माओवादीं यानाच्वंगु दु । यदि आः माओवादी हानं सरकारय् वन धाःसा उकिया नेतृत्व यायेत वरिष्ठ नेता डा. बाबुराम भट्टराईयात छ्वया हइगु खँ नं सूत्रं धाःगु दु ।
उखे सकस्यां 'आकर्षण'या केन्द्र जुयाच्वंगु मधेशी जनअधिकार फोरमया नायः उपेन्द्र यादव स्वदेश लिहां वयेवं सरकार गठनया समीकरण न्हूगु ढंगं वनीगु सम्भावना पिहां वःगु दु । उपेन्द्र यादवं सरकारया नेतृत्व फोरमं हे यायेगु धकाः खँ पिहां वयाच्वंसां वास्तवय् थ्व थःपिनि आधिकारिक लाइन मखु धासें यदि एमालेया वरिष्ठ नेता माधव नेपालया नेतृत्वय् सरकार गठन जुल धाःसा उकी थःपिं वनेत इच्छुक जुयागु खँ धाःगु दु । म्हिगः बहनी यादव व मेम्ह नेता जयप्रकाश गुप्ता माधव नेपालया छेँय् वनाः खँ ल्हाःगु खःसा उगु इलय् वय्कःपिंसं थ्व आश्वासन बियादीगु खः । तर नेपालया हे नेतृत्वय् सर-कार दयेकूसां माओवादीयात धाःसा त्वःते मजिउगु बिचाः नं वय्कःपिंसं तयादीगु खः । थ्व इलय् माओवादीयात त्वःताः वनेबलय् सरकार स्थिर जुइ फइ मखु धासें सरकार दुने उमित गय् यानाः दुकायेगु खः उकिया बारे सहलह यायेमाःगु बिचाः नं प्वंकादीगु खः ।
थ्वहे झ्वलय् मेखे न्हूगु सरकार गठन व थःपिनि भूमिका बारे बिचाः ब्याकेगु लागिं थौं एमाले स्थायी समितिया बैठक च्वनेत्यंगु दु । कन्हसंनिसें शुरु जुइत्यंगु पार्टीया केन्द्रीय बैठकया तयारीया लागिं नं थौं स्थायी समितिया बैठक च्वनेत्यंगु खः ।
उखे सरकार त्वःतेधुंकाः थौं माओवादीया पोलिब्युरो बैठक नं च्वनाच्वंगु दु । बोदेया कृषि अनुसन्धान केन्द्रया ज्याकुथी च्वनाच्वंगु उगु बैठकय् सरकार त्वःतेधुंकाःया विश्लेषण बजारय् वःगु टेप काण्ड व संघर्षया न्हूगु ज्याझ्वः क्वःछीगु खँ सूत्रं धाःगु दु ।
अथे हे कांग्रेसं नं थौं हे बैठक च्वनाः सरकारय् च्वनेगु वा मच्वनेगु निर्णय याइगु खँ सीदुगु दु ।
