९९प्रतिशत मत दक्षिणी सुडान टुक्रा यायेगु पक्षय्

अफ्रिकाया दक्षिण पूर्वीय देय् सुडान टुक्रा जुइगु निश्चित जूगु दु । दक्षिण सुडानयात न्हूगु राष्ट्र यायेगु वा मयायेगु धकाः दक्षिण सुडानय् जूगु जनमत संग्रहलय् ९९ प्रतिशत मतदातां टुक्रा जुइगु पक्षय् भोट याःगु दु ।

जनमत संग्रह आयोगया कथं दक्षिण सुडानय् जूगु जनमत संग्रहलय् ब्वति काःपिं मतदाता मध्ये ९९.५७ प्रतिशत मतदातां थःपिं न्हूगु देय्या पक्षय् दुगु धासें मतदान याःगु खः । लिच्वः सार्वजनिक जुइवं दक्षिणी सुडानया प्रान्तीय राजधानी जुबाया बासिन्दातय्सं लसता प्वंकूगु दु ।

सन् २००५य् दशकौं निसें जुयाच्वंगु युद्ध क्वचायेकाः जूगु शान्ति सम्झौताय् न्ह्यथनातः कथं सुडान टुक्रा यायेगु वा मयायेगु बारे जनमत संग्रह याःगु खः ।

सुडानी राष्ट्रपति ओमार अल बसिरं जनमत संग्रह पाखें वःगु लिच्वःयात थःम्हं स्वीकार यायेगु धाःगु दु । थुगु लिच्वः नापं वइगु जुलाई ९ तारिख कुन्हु हिलंया दकलय् न्हूगु राष्ट्र कथं दक्षिण सुडानया घोषणा जुइ ।

More Stories Like this