राज्य पुनर्संरचना मदुगु संविधान जारी यायेगु तयारी

येँ (सन्ध्या टाइम्स)/सत्ताया खिंचातानीं यानाः संविधान च्वयेगु ई मदया वंलिसे आः राजनीतिक दलतय्सं दकलय् विवादया विषय जुयाच्वंगु राज्य पुनर्संरचना सम्बन्धी छुं खँ हे मतसे संविधान जारी यायेगु तयारी यानाच्वंगु खँ सीदुगु दु ।

प्रधानमन्त्री सु जुइ धइगु खँय् तःधंगु दलतय् दथुइ ल्वापु दुसां आःयात राज्य पुनर्संरचनाया बुँदा हे मतसे संविधान जारी यायेगु खँय् धाःसा उमि दथुइ सहमति कायम जुइधुंकूगु खँ सूत्रं धाःगु दु। दलतय् दथुइ अज्याःगु सहमति जूगु हे आधारय् संविधानसभाया संवैधानिक समितिं राज्य पुनर्संरचना सम्बन्धी बुँदा मदुगु संविधानया मस्यौदा च्वयेगु ज्या न्ह्याकेधुंकूगु खँ नं सूत्रं धाःगु दु ।

संविधानसभाया राज्य पुनर्संरचना नापं राज्य शक्ति बाँडफाँड समितिया प्रतिवेदनया खँ बाहेक मेगु फुक्क हे विषयगत प्रतिवेदनयात दुथ्याकाः न्हूगु संविधन च्वयेगु भाला संविधानसभां हे संवैधानिक समितियात बीधुंकूगु दु।
थःपिंत राज्य पुनर्संरचना सम्बन्धी खँ समावेश मयासे हे संविधान मस्यौदा च्वयेगु जिम्मा वःगुलिं आः गय् यानाः ज्या न्ह्याके माली धकाः संवैधानिक समितिं म्हिगः कानूनविद्तलिसे सहलह ब्याकूगु खःसा थनिं राजनीतिक दलया नेतातलिसे नं सहलह शुरु याःगु दु। थ्व झ्वलय् थौं सुथय् संविधानसभाया दकलय् तःधंगु दल एकीकृत माओवादीया नेतातलिसे सहलह ब्याकूगु खः ।

नेतातय् दथुइ जूगु सहमति कथं न्हूगु संविधानया मस्यौदा तयार यानाः जेष्ठ १४ गते जारी यायेगु व वकुन्हु तुं संविधानसभा नं भंग याना छ्वयेगु ग्वसाः दयेकूगु दु। संविधानसभा भंग याःसां संसद धाःसा ल्यंका तइ।
राज्य पुनर्संरचनाया सवालय् आयोग दयेकेगु अले वहे आयोगया सुझाव कथं राज्य पुनर्संरचनाया ज्या संसदं हे यायेगु धकाः नं दलया नेतातय् दथुइ सहमति जुइधुंकूगु दु।
राज्य पुनर्संरचनाया सवालय् न्हूगु संविधानय् छगू अनुसूची जक घाका हयेगु ग्वसाः नं जुयाच्वंगु खँ धाःगु दु। राज्य पुनर्संरचनाया लागिं आयोग गठन जुइबलय् उकी दलतय्सं थः यःपिं मनूत जक तल धाःसा उकिं नं पाय्छि सुझाव वये मफइगु अनुमान सूत्रं याःगु दु ।