यदि थौंया अवस्था सहिदपिंसं खंगु जूसा

थनिं न्हय्गू दशक न्ह्यः तत्कालिन राणा शासकतय् विरुद्ध जूगु आन्दोलनय् ज्यान बलिदान याःपिं सहिदपिनि लुमंतिइ थौं देशय् सहिद दिवस न्यायेकाच्वंगु दु। वि.सं. १९९७ सालय् थौंया हे मितिइ देय्या प्यम्ह सपुतपिं शुक्रराज जोशी, धर्मभक्त माथेमा, गंगालाल श्रेष्ठ व दशरथ चन्दयात राणा शासकतय्सं सिमाय् यखायाः व गोलीं कयेकाः स्याना बिउगु खः। थ्वहे सहिदपिंसं बिउगु बलिदानया लिच्वः कथं देशय् राणा शासन चिलाः प्रजातन्त्र बहालि जूगु खः। वयां लिपा नं देशय् तःक्वः तःगू कथंया आन्दोलन जुजुं वयाः अन्ततः थौंया अवस्था तक झीपिं थ्यनाच्वंगु दु। तर थौं वयाः देश गुगु मछिंगु थासय् थानाच्वन, थ्व धाःसा उबलय् ज्यान बलिदान बियावंपिं सहिदपिंसं कल्पना याःगु स्थिति मखु। उबलय् झी सहिदपिंसं जनतायात रैती दयेकाः जहानियाँ शासन न्ह्याकाच्वंपिं राणातय् विरुद्ध संघर्ष याःगु खः। थौं देशय् राणा शासन ला मंत तर देश धाःसा राणा शासनया इलय् सिबें नं ग्यानापुगु मोडय् वयाः थानाच्वन। थौं देशया प्रजातन्त्र जक मखु राष्ट्रियता तक नं अस्तित्व हे दइगु खः ला मखु ला धइगु स्थितिइ थ्यनाच्वंगु दु। थौया लोकतान्त्रिक, गणतान्त्रिक धाःपिं नेतातय्सं थौं देशयात राणातय्सं सिबें नं बेढंगं न्ह्याकाः जिक्व दुर्दशा यानाच्वंगु दु। यदि देशया थौंया अवस्था अबलय् बलिदान याना वंपिं सहिदपिंसं खंगु जूसा वय्कःपिंत अवश्य नं थःपिनि बलिदानप्रति पश्चाताप जुइगु खइ। मुलुकया थ्व दुर्दशापूर्ण अवस्थाय् सहिद दिवस न्यायेकाः वय्कःपिंत श्रद्धांजलि प्वंकाया छुं अर्थ मदु। सहिदपिनि आदर्शयात लाकमं च्वानाः वहे सहिदया छ्यनय् स्वां देछायेगु गुलि जक लज्या मचाःगु ज्या जुइ?

More Stories Like this