तीर्थं जाःगु माय्केँया छेँ

मदनमोहन मिश्र

माय्कें लुमंकाः थाय् झलझल वः
न्ह्यःखाया बाः हे लुमना वः
तीर्थया शुरु नां अबु गंगालाल
जेठाम्ह काय् हे पुष्करलाल।।१।।

मेपिं गुम्ह गुम्ह गय् गय् खः मस्यू
छम्ह काय्या नां यमुनांय मुनालाल
छम्ह दु नर्मदा छम्ह दु गोदावरी
सिन्धुलाल ला कान्छाम्ह खः।।२।।

काय्पिं मातने, छेली द्यनीपिं
बिनाबि धाइपिं लालै लाल
नीलः हइम्ह मांम्ह दु धात्थें
कोलाहलपिं लालै लाल।।३।।

रहर ला म्हासु खः माय्केँ ला हाकु खः
तीर्थ थुपिं फुक शुद्ध हे खः
रहर ला बांलाः मर्स्या देशया
छुचुंमरि नापं साः नं खः।।४।।

छुचुंमरिनाप नं मल्तानाप नं
रहरया महिमा छखे हे दु
ततःधिकःपिं सन्या छुयाः न
ज्यानमारा मल्ताया गौरब दु।।५।।

मर्स्या खण्डया रहर उपाख्यान
इमि थासय् ला इमि हे दु
नँया कराहि चा, नँयागु तापक्या
झीगु देशय् नं गौरब दु।।६।।

माय्केँ खुनाः नं वः हे छुनाः नं
हाकुगु माय्केँया गौरब दु
उकिं मगाःसा तहतहगु
वाउँचिया नामं पाछाइ दु।।७।।

पाछाइ धाये ला बाछाइ धाये ला
राइ साग धाःगु पाछाइ दु
धायेत पाछाइ धा जुजु साग खः थ्व
आमालि अचार नं च्वेसं दु।।८।।

झिकूचा ह्वाःसां सकि हे छूसां
सिँकें छुनाः नं नःसां जिउ
आमालिया देश थ्व लेम्बति कागति
आमालि यलया लेलेसं दु।।९।।

आमालि अचार मदु, माय्केंया फुइँ मदु
पाछाइ हे दःसां न्हाये मदु रे
माय्कें जा पाछाइ, आमालि अचारय्
झीगु राष्ट्रया गौरब दु।।१०।।

उकिं हे खइ थन यलया प्रदेशय्
लेम्वति धाःगु लेले हे दु
आमालि थनं वइ मालेमानि धायेम्वाः
आमालि प्रदेश हे यलसं दु।।११।।

न्हिंन्हिं कोलगेटयागु विज्ञापन
टेलिभिजन दुने मस्वलं छु
च्याम्पतियागु व ह्यंवाः बुल कि
कोलगेट हे न्याये मफुसां छु?।।१२।।

नखः ला झीथाय् सिथि नखःलय्
कुमार षष्ठी धाःगु नं दु
श्लेषमान्तक वन पशुपतिनाथया
हवाइ जहाजं नःसां छु।।१३।।

ह्याउँमाय् हाकुमाय् वाउँमाय् नं दु
सवाः ला नये नंम्हं जक धाइ
उच्चारण ला दुगुया म्हुतु खः
बूबः कें ला जुजु हे खः।।१४।।

अज्ज माय् इलाः फकनय् तयेवं
तराइ भाषा ला अरिकोच जुइ
माय्केंया देय् थुगु येँ, यल सिउ ला?
माय्केंत सु�सु खः सिउ ला?।।१५।।

More Stories Like this