किरण शाक्य मंकाः खलः यलया न्हूम्ह नायः

नेपालभाषा मंकाः खलः यलया झिंछक्वःगु तःमुँज्यापाखें किरण शाक्य नायः पदय् निर्वाचित जूगु दु । थौं मंकाः खलः यलया न्हूगु नेतृत्वया लागि जूगु चुनावय् किरण शाक्यं ९७ कू मत हयादीगु खः । वयकलं नायः पदया मेम्ह उम्मेदवार सुरेन्द्रमान शाक्य (शाक्य सुरेन) स्वयां ६ कू मत अप्वः हयादीगु खः । भाजु शाक्यं थ्व स्वयां न्ह्यः मंकाः खलः यलया निगू कार्यकाल न्वकू, निगू कार्यकाल छ्यांजे व छगू कार्यकाल दुजः जुयाः ज्या यानादीधुंकूगु दु ।

अथेहे दुजः पदय् चमेली शाक्य १६५, चतुर व्यंजनकार १६३ रमा तुलाधर १३४, बाबुराजा महर्जन १२८, ऋषि प्रसाद श्रेष्ठ १२६, शैलेस बहादुर प्रधान १२३, ज्ञान बहादुर महर्जन ११८, हरि बहादुर कर्माचार्य १११, सुरेन्द्र महर्जन १०९, कीर्तिलव आनन्द जोशी १०४, काजीरत्न शाक्य १०२ व केशव महर्जन ९७ मत हयाः निर्वाचित जूगु दु ।

थ्वहे झ्वलय् याकनं हे निर्वाचित जुयादीपिं मुँज्या च्वनाः पद विभाजन याइगु खँ धाःगु दु ।

थौं जूगु तःमुँज्याय् पुलांपिं नायःत छत्र बहादुर कायस्थ, डा. पुष्पराज कर्णिकार भुवनेश्वर जोशी, जुलुमलाल चित्रकार व शंकर बहादुर मल्लं तःमुँज्याया मंका कथं उलेज्या यानादीगु खः । उगु ज्याझ्वलय् नेवाःत ई कथं न्ह्याः वनेमाःगु खँय् बः बियादिसें मंकाः खलः यलपाखें यक्व ज्या यायेमफूसां समय सापेक्ष कथं नेवाः स्वायत्त राज्य लिसें थी थी विषययात तिबः बी कथं ज्या याःगु खँय् सन्तुष्ट प्वंकादिसें तःमुँज्या ताःलायेमा धकाः भिन्तुना देछाना दिल । नायः सुरेश प्रधानया सभापतित्वय् जूगु उगु ज्याझ्वः छ्यांजे ऋषि प्रसाद श्रेष्ठं न्ह्याकादीगु खः ।

थ्वहे झ्वलय् निगूगु बन्द सत्रय् छ्यांजे ऋषि प्रसाद श्रेष्ठं प्रगति प्रतिवेदन व दांभरि बाबुराजा महर्जनं आर्थिक प्रतिवेदन न्ह्यब्वयादीगु खःसा सल्लाहकार लोक बहादुर शाक्यया संयोजकत्वय् दयेकूगु विधान संशोधन समितिपाखे न्ह्यब्वःगु संशोधित विधानयात कयाः नं सहलह जूगु खः ।

More Stories Like this