सर्टवेभय् बीबीसी नेपाली सेवा बन्द जुइगु

थीथी ३२गू विकास उन्मुख देय्या भासं संचालन जुयाच्वंगु बीबीसीया अन्तर्राष्ट्रिय सेवाया सर्टवेभपाखें नेपाली सेवा बन्द याइगु जूगु दु । सर्टवेभय् थुगु सेवा बन्द जूसां एफएम व इन्टरनेटय् धाःसाः न्यनेफइ ।

वइगु मार्चं निसें नेपाली नापं हिन्दी, किर्गिज, स्वाहाली, रुवाण्डाया ग्रेट लेक व बरुण्डी सेवा बन्द यायेगु घोषणा बीबीसीं याःगु दु । दँय् ४६गू मिलियन पाउण्ड बचे यायेगु ताः तयाः बीबीसी रेडियों थुगु सेवा बन्द यायेत्यंगु खः ।

तत्काल बीबीसीं मेसोडोनियन, अल्बानियन, सर्बियन, क्यारोबियन, अंग्रेजी व अफ्रिकाया निंतिं पोर्टुगिज भाय् बन्द यायेगु घोषणा याःगु दु । थ्व नापं अजेरी, चिनियाँ, रुसी, क्युबाया निंतिं स्पेनी, टक्रिर्स, भियतनामि व युक्रेनियन भाय् नं बिस्तारं बन्द यायेगु धाःगु दु । अथेहे बिबिसीं ६५०म्ह कर्मचारीतय्त कटौति यायेगु योजना तःगु दु ।

बेलायती सरकारं थःगु स्यानाच्वंगु अर्थतन्त्र सुधार यायेत सार्वजनिक संस्थातय्त सन् २०१४ निसें १६ प्रतिशतं अनुदान म्हो यायेगु घोषणा लिपा बीबीसीं थः हे सक्षम जुइत थीथी सेवा नापं कर्मचारी कटौति अभियान न्ह्याकूगु खः ।

थुगु योजना पाखें १८० मिलियन स्रोता, दर्शक व ब्वनामि दुगु बीबीसीया सेवाग्रहीत ३० मिलियनं कुहांवना १५०लय् थ्यनीगु स्रोततय्सं धाःगु दुसा बीबीसी ग्लोबल न्युजया निर्देशक पिटर होरोकसं थुगु तथ्यांक सार्वजनिक जूगु न्हियात बिबिसीया पिडाडायिक न्हिया संज्ञा बियादीगु दु ।

More Stories Like this