ज्ञानेन्द्रयात अमेरिकाया दवाव

ज्ञानेन्द्रकालीन सत्ता बारे विकिलिक्सया न्हूगु खँ खुलासा

येँ (सन्ध्या टाइम्स)/नेपालय् पुलांम्ह जुजु ज्ञानेन्द्रं प्रत्यक्ष शासन चले यानाच्वंगु इलय् अमेरिकां अबलय् जुजु ज्ञानेन्द्रं चीनयात लय्तायेकेत काःगु नीति हिलेत दवाव बिउगु खँ आः वयाः खुले जूगु दु ।

विकिलिक्सपाखें सार्वजनिक याःगु अमेरिकी दस्तावेजत पिहां वयेगु झ्वलय् थ्व खँ नं खुले जूगु खः। अबलय् जुजु ज्ञानेन्द्रं चीनयात थःगु ल्हातय् कायेगु लागिं नेपालय् चायेकातःगु तिब्बती शरणार्थीतय् ज्याकू बन्द यासें नेपालय् जुइगु तिब्बती शरणार्थीतय् गतिविधियात नं कडा रुपं निगरानी तयेगु शुरु याना हःगु खः। उकिं यानाः नेपालय् तिब्बतीतय् गतिविधि बांलाक न्ह्याये मफुगु खः।
तर तिब्बती शरणार्थीतय् गतिविधि न्ह्याये मफुगु उगु अवस्थायात अमेरिकां धाःसा यः मतायेकूगु जुयाच्वन। गुकिं यानाः नेपाःया निंतिं तत्कालिन अमेरिकी राजदूत जेम्स मारियार्टीं जुजुयात तःक्वःमछि नापलानाः तिब्बतीतय् गतिविधियात छुट बीत दवाव बिउगु खः। यदि जुजु ज्ञानेन्द्रं तिब्बती गतिविधियात छुट बिल धाःसा नेपाःयात थःपिंसं पना तइगु थीथी कथंया ल्वाभः बीगु नं शुरु याना हयेगु खँ धाःगु खः ।

तर जुजु ज्ञानेन्द्रं अमेरिकाया उगु शर्तयात कयाः हानं मेगु छगू नं शर्त तःगु जुयाच्वन। अबलय् ज्ञानेन्द्रं अमेरिकायात भूटानी शरणार्थी लित यंकेगु सवालय् भूटानयात दवाव बिया बी माल धइगु शर्त तःगु खः। अमेरिकां उकी ग्वाहालि यायेगु बचं बीवं तत्कालिन परराष्ट्र मन्त्री रमेशनाथ पाण्डे भूटान वनाः शरणार्थी लित यंकेगु बारे वार्ता याःगु खः।
तर भूटानं नेपाःया खँ धाःसा मन्यंगु जुयाच्वन। थुकिं यानाः तंचाःम्ह रमेशनाथ पाण्डे नेपाः वयाः अमेरिकी राजदूतयात तं प्वंकूगु खँ नं विकिलिक्सं सार्वजनिक याःगु दु ।

अमेरिकां धाःसा ज्ञानेन्द्रयात फयांफछि याकनं लोकतन्त्र बियाः स्थिति सामान्य यायेत सुझाव बिउगु खः। यदि ज्ञानेन्द्रं याकनं समस्या ज्यंकाः दलतय्त राजनीतिक ज्याखँ याके मबिल धाःसा नेपाः नं बर्माया लँपुइ वनी धकाः ख्याच्वः बिउगु खः ।

उगु इलय् परराष्ट्र मन्त्री रमेशनाथ पाण्डें अमेरिकी राजदूतयात नापलानाः जुजु ज्ञानेन्द्र अमेरिकालिसे विशेष स्वापू तयेत तयार दु धकाः नं धाःगु खः। तर राजदूत मोरियार्टीं धाःसा ज्ञानेन्द्रया बिचाः छु खः धकाः निं सीकेमाःगु खँ धयाच्वंगु खः ।

लिपा मोरियार्टीं धाःगु खँयात ज्ञानेन्द्रं गम्भीरतापूर्वक मकाल धकाः आन्दोलनकारीतय् खँयात साथ बियाः जुजुया साथ बीगु त्वःतूगु खः। अन्तिमय् मोरियार्टी ज्ञानेन्द्रयात नाप मलासे लिहां वंगु खः ।