आः समायोजनया ज्या नं याकनं न्ह्याकेमाः

थःत नागरिक पार्टी धाइपिं दलतय् निंतिं कपाः स्याःगु विषय जुयाच्वंगु माओवादी लडाकुत आः वहे 'नागरिक पार्टी'या दुजःत च्वनाः गठन यानातःगु विशेष समिति अन्तर्गत तयेगु ज्या वंगु शनिवाः सम्पन्न जूगु दु। माओवादी लडाकुयात विशेष समिति अन्तर्गत तयेफुगु ज्यायात सकलें राजनीतिक पार्टीया नेतातय्सं तःधंगु हे उपलब्धी कथं व्याख्या याःगु स्वयेबलय् थ्व ज्यापाखें सकलें राजनीतिक पार्टीत अतिकं सन्तुष्ट जूगु आभास ब्वलंगु दु ।

तर लडाकुयात विशेष समिति अन्तर्गत तयेवं हे लडाकुया समस्या समाधान जुयाः देशय् स्थायी शान्ति वइगु हे जुल धकाः ग्यारेन्टी बीगु ई धाःसा अझ नं मवःनि। छाय्धाःसां थीथी शिविरय् तयातःगु लडाकुया ल्वाभः तइगु कन्टेनरया ताःचा अझ नं माओवादीया हे ल्हातय् दनि। थ्व ताःचा उमिसं राज्ययात अबलय् जक लःल्हाइ गबलय् कि थ्व लडाकुया समायोजन व पुनर्स्थापनाया ज्या पूवंक क्वचाइ। तर लडाकुया समायोजन व पुनर्स्थापना गुकथं ग्वःम्ह तक यायेगु धइगु खँय् धाःसा दलतय् दथुइ अझ नं विवाद कायम हे दनि। दलतय्सं थ्व समस्या समाधान मयाःतले माओवादी लडाकुया समस्या समाधान जुल धकाः तायेकेगु पाय्छि जुइ मखुनि। उकिं तःधंगु दलतय्सं पिने देशया समेत दसुतपाखें शिक्षा कयाः याकनं हे थ्व समस्या समाधान याना छ्वयेमाः। माओवादीं थःपिनि लडाकु सहज रुपं विशेष समिति मातहत तये हःगुलिं थुकिं छगू कथंया विश्वासया वातावरण धाःसा ब्वलंगु दु। आः थ्वहे विश्वासय् दनाः निगुलिं पक्षं माओवादी लडाकुया समायोजन ज्यायात पूर्णता बीगु पलाः न्ह्याकेमाः ।

More Stories Like this