मिसा पुचलं ग्वसाः ग्वःगु न्वचु कला

पुष्परत्न ताम्राकार 'स्वीटहर्ट'

उदाय् समाजया मिसा पुचःया ग्वसालय् "प्रभावकारी न्वचु कला तालिम" वंगु ने.सं. ११३१ पोहेलाथ्व चौथी (०६७ पुस २४ गते) सनिवाः कुन्हु श्री दिगुख्यः गुथि पकनाय्जःया छेँय् जुल। छन्हु जक न्ह्याःगु उगु तालिम ज्याझ्वलय् ब्वति काःपिं प्रशिक्षार्थी मध्ये अप्वः मय्जुपिं खनेदु। भाजुपिनिगु ल्याः धाःसा थुम्ह च्वमि नापं यानाः मुक्कं स्वम्ह जक खः। मुक्कं प्रशिक्षार्थी ३१ म्ह दुगु खः। उकी मध्ये २८ म्ह ला मय्जुपिं खः। धात्थें धायेगु खःसा थुज्वःगु न्वचु कला थेंज्याःगु अतिकं महत्वपूर्णगु तालिमय् थथे छन्हु जक यानाः ला गाःगु मखु। म्हतिं नं स्वन्हु वा प्यन्हु ला याये हे माः थें च्वं। अथे नं आःयात ला मयाःगु स्वयाः नं याःगु खनाबलय् 'मदइबलय् अलःमां नं सिमां' थें जुया बिउगु दु। उकिं छन्हु जक याःगुली नं लुधंकाच्वने माःगु दु। थथे मय्जुपिनिगु ल्याः अप्वः खनाबलय् तसकं लय्ताल। छाय्धाःसा न्हापा न्हापा जूसां छुं नं ज्याझ्वलय् मय्जुपिनिगु स्वयाः भाजुपिनिगु ल्याः अप्वः जुयाच्वनीगु तर थुगु ज्याझ्वलय् धाःसा पाय्छि अःखः जुया बिउगु दु। थुकिं मय्जुपिं नं सुं स्वयाः म्हो मखु धइगु खँया दसु बियाच्वंगु दु। थ्व तसकं च्वछायेबहः जू ।

छता खँ छु धाये मास्ते वः धाःसा "न्वचु कला" थें जाःगु महत्वपूर्णगु तालिमय् नं भाजुपिनिगु ल्याः गथे म्हो जुल? थुकिया मू हुनि छु? प्रचार प्रसार गाक्कं मजूगुलिं जकं खः ला? वा मिसा पुचलं ग्वसाः ग्वःगुलिं भाजुपिं वने मजिउ धइगु नकारात्मक भावनां खः व धाःसा छुं नं सीके मफुत। यदि मिसा पुचलं "मय्जुपिनिगु निंतिं जक" धयातःगु जूसा ला पाय्छि हे खः, वने नं मजिउगु जुल। अथे मखु धइगु जूसा भाजु सु मय्जु सु, न्ह्याम्ह वंसां जिउ। तर जिगु विचारं ला तालिम धइगु निथ्वःसितं माःगुलिं मिसा पुचलं ग्वसाः ग्वःगु जुइमा वा मिजं पुचलं, न्ह्याम्हसिनं ग्वसाः ग्वःगु जूसां न्ह्याम्ह वंसां जिउ। उकिं झी सुनानं मिसा पुचः वा मिजं पुचः धकाः कयेकुंगु मनं लैंगिक भावना ब्वलंके मजिउ। मिजं-मिसा बराबर जुसेंलि निथ्वःसिनं नं बराबर कथं पलाः न्ह्याकाः वनेमाः ।

न्ह्यागु थजु छन्हु जक जूसां न्ह्याइपुगु लकसय् सुथांलाक्क न्ह्यानाः उगु ज्याझ्वः ताःलानावंगु दु। उकिं दकलय् न्हापां उदाय् समाज, उदाय् समाजया मिसा पुचः, थाय् बियाः ग्वाहालि यानादीम्ह श्री दिगुख्यः गुथियालिसें तालिमया ज्याझ्वः झःझः धायेकेत दबुली झायादीपिं न्वकु संयोजक प्रभा स्थापित, मिसा पुचःया नकिं मिरा ज्योति कसाः, उदाय् समाजया न्वकु डा. प्रेम रत्न स्थापित, उद्घोषिका मय्जु डा. सुमनकमल तुलाधर अले तालिम बियादीपिं मय्जु कीर्ति तुलाधर व भाजु प्रमिल स्थापितपिंत नं दुनुगलंनिसें स्वां ह्वयेकाः सुभाय् देमछासें मगाः। छाय् धाःसा मिसा पुचःया ग्वसालय् थःपिनिगु मू वंगु ई बियाः भ्याः भतिचा हे उसि मचासे न्ह्याइपुक, यइपुक प्यघौ न्याघौतक तालिम बियादिल।
खतुं थुगु उदाय् समाजया मिसा पुचलं वंगु ने.सं. ११३१ थिंलाथ्व षष्ठीकुन्हु नं थुगु हे थासय् तःनिगः बःनिगः ग्वःजा दयेकेगु तालिमया नं ग्वसाः ग्वयेधुंकूगु जुयाच्वन। थ्व नं च्वछायेबहः जू। इलय् ब्यलय् थथे हे थीथी कथंया तालिम बियाः वनेमाःगु थौंया इलय् तसकं आवश्यकता खनेदु। छाय्धाःसा थौंकन्हय्या न्हू पुस्तां झीगु तजिलजि, झीगु संस्कारय् मदयेकं हे मगाःगु थीथी ताया हलंज्वलं झंझं मसियाः वनेधुंकल। अझ धायेगु खःसा स्वये खने तकं मखना वनेधुंकल। अथे जूगुलिं थथे मसिया वनाच्वंगु हलंज्वलंत सीके बीया निंतिं नं तालिम बियाः उकिया म्हसीका तकं बियाः तालिम बिया वनेमाःगु दु। थथे इलय् ब्यलय् तालिम बिया वन धाःसा मसिया वनाच्वंपिं न्हू पुस्तां अःपुक हे सीका काये फइ धइगु भलसा कायेछिं।
थौं गुगु नवायेगु कलाया तालिम बीगु ज्या मिसा पुचलं न्ह्याकल, उकियात लसकुस यानाः च्वमछासें मगाः। झीगु जीवनय् नये, त्वने, पुनेया गुलि आवश्यक खः उलि हे नवायेगु नं आवश्यक जू। माःथाय् माःगु इलय् नवाये मफुत वा नवाये मसल धाःसा जीवनय् छुं नं ज्या पूवंक याये फइ मखु। उकिं नवायेत नं न्वचु कला माः। न्वचु कलाया पूवंक ज्ञान दत धाःसा न्ह्याथाय् नं उलि हे बांलाक नवाये फइ। छेँय् जक सिंह जुयाः हालाः हाकनं लगःधगः व च्वःप्वः मदयेक, हिसि मदयेक, सुयां स्वये मयेक व न्यने मयेक मनय् वःवःथें लाक्व पाक्व नवाये मजिउ। सकसिनं ययेक व सकसिगु मन त्याके फइ कथं नवायेमाः। थुकिया निंतिं न्वचु कला छगू मदयेक मगाःगु आवश्यकता खः। गुगु कलां बांलाक नवायेगु स्यना बी। उकिं थुगु न्वचु कला तसकं महत्वपूर्णगु वस्तु खः। झीसं सयेका मतसे मगाः। थुज्वःगु तालिम ला लय् लय् पतिकं बीगु याना वनां तुं च्वनेमाः ।

उदाय् समाजया मिसा पुचलं गुगु ताः तयाः प्रभावकारी न्वचु कला तालिमया ग्वसाः ग्वयाः न्ह्याकूगु ज्या खः व तसकं हे प्रभावकारी जू। थुगु तालिमं लिपा वनाः छम्ह सक्षमम्ह व्यक्ति जू वने फइगु यक्वं सम्भावना दु। उकिं हाकनं छक्वः लिसा कयाः सुभाय्या नापनापं सकलसितं भिंतुना नं देछायाच्वन ।

More Stories Like this