समायोजनया विवाद कायम हे

न्हापां संख्या तोके या: सरकार / न्हापां मोडालिटी दयेकि: माओवादी

येँ (सन्ध्या टाइम्स)/माओवादी लडाकुतय्त विशेष समिति अन्तर्गत तयेगु ज्या क्वचायेधुंकाः नं आः लडाकुयात गय् यानाः समायोजन यायेगु धइगु मुख्य ज्या धाःसा ल्यं हे दनिगु खँ मानव अधिकारवादी नेता पद्मरत्न तुलाधरं धयादीगु दु ।

लडाकु समायोजनया सवालय् न्हापांनिसें वयाच्वंगु विवाद नं यथावत हे जुयाच्वंगु कारणं विशेष समिति अन्तर्गत सेना वल धकाः खास हे लय्तायेमाःगु खँ मदुगु बिचाः नं वय्कलं प्वंकादीगु दु ।

म्हिगः लडाकुयात विशेष समिति अन्तर्गत यंकूगु ज्याया बारे थौं 'सन्ध्या टाइम्स'लिसे खँ ल्हासें भाजु तुलाधरं थ्व बिचाः प्वंकादीगु खः ।

वय्कलं धयादिल, 'लडाकुयात विशेष समिति अन्तर्गत तःगु बांलाःगु ज्या ला खः तर थ्व लडाकुयात समायोजन याना यंकेगु सवालय् न्हापांनिसें माओवादी व एमाले-कांग्रेस दथुइ कायम जुयाच्वंगु विवाद धाःसा यथावत दनि ।'

वय्कःया कथं एमाले-कांग्रेसं सुरक्षा निकायय् ग्वःम्ह लडाकु यंकेगु खः संख्या आः हे किटान यायमाः धयाच्वंगु दुसा मेखे माओवादीं थः लडाकुत मध्ये ग्वःम्ह सुरक्षा निकायय् वनी व ग्वःम्ह सरकारया पुनर्स्थापना प्याकेज ज्वनाः पिहां वनी धइगु खँ क्वःछीत दकलय् न्हापां छगू मापदण्ड निं दयेकेमाः धयाच्वंगु दु। थ्व खँय् आः तकं सहमति जुइ मफुनि। यदि थुकी सहमति मजुल धाःसा लडाकु समस्या यथावत हे जयाच्वनीगु खँ नं वय्कलं कनादिल ।

लडाकुत विशेष समिति अन्तर्गत तःसां उपिं माओवादी कमाण्डर पासाङ्गया हे कमाण्ड अन्तर्गत च्वनी ।

विशेष समितियात ध्यबाया समस्या
माओवादी लडाकुयात विशेष समिति अन्तर्गत तयेगु ज्या ला जुल तर तर उमिगु बारे ज्या यायेगु लागिं विशेष समितियात धाःसा ध्यबाया समस्या जुयाच्वंगु खँ समितिया संयोजक बालानन्द शर्मां धयादीगु दु। उगु समितिं लडाकुयात सु गन वने न्ह्याः सीकेगु लागिं छगू सर्भे पुचः गठन यानाः लडाकुतय् बिचाः बुझे याकेगु निर्णय यानातःगु दु। तर उगु ज्या न्ह्याकेगु लागिं समितियात आर्थिक अभाव जुयाच्वंगु दु। समितिं लछिया दुने हे थुकिया मोडालिटी दयेकेगु धकाः तयारी यानाच्वंगु दु। तर आर्थिक अभावं यानाः ज्या न्ह्याके फयाच्वंगु मदु। थ्व समितियात थज्याःगु ज्या यायेगु लागिं माःगु खर्च सरकारं बीगु खः लाकि दाता राष्ट्रतय्सं चूलाका बीगु खः आः तक स्पष्ट मजूनिगु खँ नं भाजु शर्मां कनादीगु दु ।