न्यायालय शुद्धीकरण यायेगु न्हापांगु पलाः

सर्वोच्च अदालतया न्यायाधीश रण बहादुर बमयात महाभियोग लगे यायेगु लागिं संसदय् शुरु जूगु तयारीया नापनापं देय्या कानूनं गबलें थी मफयाच्वंगु न्यायिक ख्यलय् नं आः शुद्धीकरणया पलाः न्ह्यायेत्यंगु दु। क्वय्या अदालतं कारवाही यायेमाः धकाः यानातःगु फैसलायात दथुइ ध्यबा नयाः न्यायाधीश बमं उल्टे याना बिउगु खँ पत्ता लगे जुइवं वय्कःयात कारवाहीया लागिं प्रक्रिया शुरु याःगु खः। वय्कलं ध्यबा नयाः त्वःता छ्वःपिं अपराधीतय्सं हे चितवनया चिकित्सा कलेजया डीन डा. भक्तमान श्रेष्ठयात अपहरण याःगु खःसा लिपा प्रहरीं उपिं अपहरणकारीतय्त ज्वंबलय् तिनि उपिं न्यायाधीश बमं त्वःता छ्वःपिं अपराधीत खः धइगु खँ खुले जूगु खः। वहे आधारय् न्यायाधीश बमयात आः कारवाहीया लागिं पलाः न्ह्याकूगु खः। बमयात कारवाही यायेगु धकाः स्वंगुलिं तःधंगु पार्टीं सहमति यानाः सदनय् महाभियोग तयेगु तयारी याःगु कारणं आः वय्कःयात सुनां नं बचे याये फइ मखु धकाः आशा यायेगु थाय् दु ।

यदि वय्कःयात सदनय् महाभियोग तल धाःसा सुं नं बहालवाला न्यायाधीशयात कारवाही याःगु थ्वहे न्हापांगु घटना जुइ। थुकिया लागिं सर्वोच्चया प्रधानन्यायाधीश स्वयमं हे पहल यानाच्वंगु कारणं वय्कःया साहसयात च्वछाये हे माः। देय्या न्यायिक क्षेत्र गुलि बदनाम जुइधुंकल धइगु खँ थ्व स्वयां न्ह्याः गाक्कं चर्चित जुयाच्वंगु हे खः। आः उकियात शुद्धीकरण यानाः जनताया विश्वास त्याकेगु ज्याय् न्ह्याःगु थ्व पलाखं न्यायिक ख्यलय् छुं सुधार जुइगु आशा ब्वलंका बिउगु दु। कारवाहीया प्रक्रियाय् सदन याकनं न्ह्याः वनेमाः ।

More Stories Like this