छम्ह ब्वँमिया मिखाय् 'सन्ध्या टाइम्स'

अमृतमान शाक्यभिक्षु

नेवाः वस्ती नेवाः पत्रिकाया बारे छुं चर्चा यायेबहः जू। खय्त ला न्हापा राणा शासन कालय् नेवाः साहित्य च्वःपिंत सजाँय तकं बीगुलिं नेवाःतसें छुं च्वये तसकं थाकु। अय्नं झी नेवाः साहित्यकारतय्सं थःगु नां त्वपुयाः जूसां च्वसुत च्वयाः जागरण थकयाच्वंगु खः। उगु इलय् नेवाः भासं च्वयातःगु भजन सफू जफत यानाः नं मगानाः भजन याइपिंत तकं ज्वनाः कुना बिउगु खः। अज्याःगु इलय् नं नेवाः साहित्यकारतय्सं च्वयेगु मदिकू। पंचायतकालय् अञ्चलाधीश ज्याकूपाखें अनुमति कयाः सफू पिकायेमाःगु अवस्था तकं दुगु खः ।

राणाकालय् नेपालभाषां च्वयातःगु धर्मदूत, धर्मोदय थेंज्याःगु पत्रिका भारतया सारनाथं पिकयाच्वन। गबलें कालिम्पोङ्गं पिहां वयाच्वन। पञ्चायतकालय् नं नेपालभाषां पत्रिका पिहां वयाच्वंगु खः। फत्तेबहादुर सिंहजुं पिथनादीगु 'नेपालभाषा' पत्रिका छुं दँ तक पिदन। आःतक नं खिउँलय् फत्ते बहादुरया छेँया अंगलय् 'नेपालभाषा पत्रिका' धकाः सिँयागु आखः तिका तःगु दनि। नेपालभाषा पत्रिका दी धुनेवं मल्ल के.सुन्दरजुं 'इनाप' वाःपौ नं पिकयादीगु खः। लिपा 'इनाप' नं बन्द जुल। अबलय् 'राजमति' वाःपौ पिहां वयाच्वंगु खः, व नं बन्द जुल। वयां लिपा 'विश्वभूमि' न्हिपौ पिहां वल। 'विश्वभूमि' आपालं चर्चाय् वल। उगु इलय् ब्वँमिपिनि नुगः साले फइकथं समाचार, च्वखँ, ज्ञान, विज्ञान, धर्म, संस्कृति, साहित्य दुथ्याःगु तँसापौ नं पिहां वःसां लिपा उलि चर्चाय् मवल। आन्तरिक विवादं यानाः लिपा 'न्हूगु विश्वभूमि' पिहां वल। विश्वभूमि व न्हूगु विश्वभूमि लिपा 'सन्ध्या टाइम्स' पिहां वल। स्वइपिंत मछिं पहः वल। न्हापा छगू जक स्वयाच्वंथाय् लिपा स्वंगू स्वये माल। लिपा विश्वभूमि व न्हूगु विश्वभूमि निगुलिं दिनावन। 'सन्ध्या टाइम्स' छगू चाहिं थःगु हे पहलं न्ह्यानाच्वन। ब्वँमिपिंत चाकुमाकु सवाः बियाः न्हिंन्हिं पत्रिका ब्वंके बिल। रङ्गीन किपा तयाः शुक्रवाःया तँसापौ नं पिकाल। ल्याय्म्हल्यासेपिं व मचातय्त यःकथं तँसापौ पिहां वल। लिपा रङ्गीन किपा तयाः छापेमजुल। सादा शुक्रवाःया तँसापौ थौंतक मदिक्क न्ह्यानाच्वंगु दु ।

'सन्ध्या टाइम्स' पुचलं हे ब्वँमिपिंत लय् छक्वः 'हिसि' नांगु लय्पौ नं ब्वंका वयाच्वंगु खः। व नं मचायेक दिना वन। 'सन्ध्या टाइम्सं' आपालं ब्वँमिपिनिगु नुगः साले फत। तर तःधं साइजया पत्रिका पिहां वयेमाःथाय् झन् चीधं जुयाः पिहां वल। पत्रिकाया मू नं स्वतका व शुक्रवाःया तँसापौया मू न्यातका काल। गबलें गबलें प्यंगू पेजया पत्रिका पिहां वइबलय् नं स्वतका हे कयाबिल। छगू ला पत्रिकाया साइज नं चीधं अले ध्यबा नं स्वतका कायेगु याइगु। न्हापा नितका जुयाच्वंगु निगू पेज बढे जूबलय् स्वतका जुल। देशया स्थिति स्वयेगु खःसा तसकं नाजुक, लोडसेडिङ्गं यानाः पत्रिका पिहां वइगु ठेगान मदु। अले थुकिं यानाः स्वइपिंसं इलय् स्वये मखन। नियमित ब्वनेगु बानी जुइधुंकूपिंत इलय् पत्रिका पिहां मवल कि खिउँ इलय् न्याः वने मालीगु अले पत्रिका वितरणय् वःपिंत नं थाकुइगु अवस्थाया सिर्जना जुयाच्वंगु दु। 'सन्ध्या टाइम्स' पिथना पुचलं आवंलि सन्ध्या टाइम्सया नां हिलाः सुथसिया इलय् पिकायेगु यात धाःसा ब्वँमिपिंत ब्वनेगु ह्वःताः चूलाइ थें ताया। तर आः झीगु न्ह्यःने 'झीगु स्वनिगः' न्हिपौ जुयाः न्हियान्हिथं पिहां वयाच्वंगु दु। थुखेपाखे नं बिचाः यायेमाः थें च्वं। पत्रिका पिकायेत विज्ञापनया आवश्यकता दु। वहे विज्ञापन व विज्ञापनया निंतिं अलग हे तँसापौ तयेमाःगु आवश्यकता दु थें च्वं ।

ततःपाःगु विज्ञापनं यानाः बुखँ म्हो जुयाः स्वयेगु सामाग्री आपाः मदु। थौंकन्हय् पत्रिका स्वयेगु ला बुखँ स्वयेगु मखु, विज्ञापन स्वयेगु थें जुयाच्वंगु दु। खय्त ला इलय्ब्यलय् तँसापौ दइबलय् आपालं विज्ञापन नं तयेगु याना वयाच्वंगु खः। थुकी बुखँ स्वइपिनिगु निंतिं रोचक बुखँ अप्वः तये माल। 'सन्ध्या टाइम्स' प्रजातान्त्रिक ढंगं न्ह्यानाच्वंगु कारणं थुकियात तपाःगु हे साइजय् हल धाःसा आपालं बुखँ व विज्ञापन न्ह्यंकेगु सम्भावना दइ। 'सन्ध्या टाइम्स' १६ दँय् क्यनेधुंकल। उकिं आः 'सन्ध्या टाइम्स' न्हापाथें चिकिचा पाः जुयाः च्वने मजिल। तपाः जुयाः स्वनिगलं पिने नं न्यनाः न्हिथं आपालं पत्रिका पिकाये माल। नेवाः शहरं पिनेया नेवाःतय्सं नं स्वयेगु मंतुना तइकथं पिकाये माल। खय्त ला 'सन्ध्या टाइम्स' इन्टरनेटय् नं दुथ्याये धुंकल। थुकिं यानाः संसारभरया हे ब्वँमितय्सं थ्व पत्रिका स्वयेफु। अय्नं पत्रिका हे न्यानाः स्वइपिनिगु निंतिं धाःसा त्वाःत्वाः पकिंया पत्रिका पसलय् थ्यंके माःगु आवश्यकता जुयाच्वंगु दु। असं, मरु, थाय्मरुइ जक न्यनाः मजिल। न्यंकभनं न्यनीकथं जुइ माल, चर्चाय् हयेमाल अले पत्रिकाया मात्राय् वृद्धि नं याये माल। बांबांलाःगु च्वसु च्वइपिंत पारिश्रमिक बियाः जूसां च्वसु च्वके माल। सन्ध्या टाइम्स थौंया इलय् नेवाः मात्रया न्हाय् जुयाच्वंगु दु। अथे धायेवं झीगु न्ह्यःने न्हिपौ, बाःछिपौ, लय्पौ जुयाः तःगूमछि पत्रिकात पिहां वयाच्वंगु मदुगु नं मखु। आपालं प्रति चुइके माल, लित यंके म्वायेक न्हियान्हिथं नेवाःतय्सं थःगु हे सम्पत्ति भाःपाः स्वया बीमाल। सन्ध्या टाइम्सयात निरन्तरता बीमाःगु दु। न्हापायागु पत्रिका थें दँ�दँ चले यानाः त्वःते मजिल। थुकियात सकल नेवाः न्ह्यलुवात मुनाः नेवाः नुगलय् तयाः सदा सर्वदा कालं थीर जुइक चले यायेमाःगु आवश्यकता दु। सन्ध्या टाइम्स १६ दँय् निरन्तर पिदनाच्वंगु ला साबित हे जुइधुंकूगु दु तर न्हापा शनिवाः नं पिकया वयाच्वंगु जूसां आः शनिवाः छन्हु पिहां मवल। न्हिपौ धासेंलि उकियात नं निरन्तरता बीमाः थें च्वं ।

More Stories Like this