मदुम्ह गिरिजाप्रसादया प्रेरणाय् दयेकूगु सँकिपाः - 'शासन'

मदुम्ह गिरिजाप्रसाद कोइरालाया प्रेरणाय् 'शासन' नांया समसामयीक देय्या अवस्था कःघानातःगु सँकिपाः रिलज जुइगु तयारी दु । मदुम्ह कोइरालालिसे लिक्कया स्वापू दुम्ह लोकेन्द्र कार्कीं छगू करोड, न्यय्गू लखया तःधंगु लागतय् निर्माण याःगु उगु सँकिपाः लच्छिया दुने प्रदर्शन यायेगु कथं तयारी जुयाच्वंगु जानकारी ब्यूगु दु ।

रिपोर्टस क्लब नेपालय् पत्रकार सम्मेलनया ग्वसाः ग्वयाः निर्माता कार्कीं मदुम्ह कोइरालां नापलाये ज्याय् कलापाखें समाज व राजनीतिइ दुगु विकृतियात उन्मुल यायेमाः धकाः ब्यूगु सुझावपाखें प्रभावित जुयाः थःम्हं 'शासन' नांया सँकिपा दयेकाःगु जानकारी बियादीगु खः ।

राजनीतिज्ञपाखें प्रभावित जुयाः सँकिपाः दयेकूसां नं सँकिपाः छु नं वाद व पार्टीया दर्शनपाखें प्रभावित मजुसे मानवअधिकारया उल्लंघनय् देय्या प्रमुख निसें प्रशासनतक्क फुक्क समानरुपं दुथ्यानाच्वंगु तथ्ययात न्ह्यःब्वयातःगु निर्माण पक्षया दाबी दु ।

पार्टी व संगठनलिसे आबद्धपिनिगु मानवअधिकार उल्लंघनया घटना जोड तोडं दःसां नं व्यक्तिया मानवअधिकार उल्लंघनया घटनाप्रति सुनां नं वास्ता मयायेगु यानाच्वंगु तथ्य व फुक्कसिया देय्प्रतिया जिम्मेवारीप्रति सजग जुइत थुगु सँकिपाय् इनाप यानातःगु निर्माता कार्कीं जानकारी ब्यूगु दु ।

नेपाःया प्रमुख थाय्त राष्ट्रपति भवन, प्रधानमन्त्री निवास, सिंहदरवार लगायतया क्षेत्रय् सुटिङ्ग यानातःगु उगु सँकिपाय् निर्माता कार्कीलिसे सम्राट सापकोटा, रेखा थापा, सन्चिता लुईंटेल व नीरशाह लगायतया प्याखंम्वःपिंसं अभिनय याःगु दु ।

More Stories Like this