अन्तर्राष्ट्रिय समुदायपाखें लसकुस

येँ (झीगु स्वनिगः)

अन्तर्राष्ट्रिय समुदायं माओवादी जनसेना विशेष समिति मातहत वःगुलिं लसकुस याःगु दु । उमिसं नेपाःया शान्ति प्रक्रियाया ल्यं दनीगु ज्या नं पूवंकेमाःगु खँय् बहः ब्यूगु दु । नेपाःस्थित अमेरिकी दूतावासं म्हिगः विज्ञप्ति पिकयाः जनसेना विशेष समिति मातहत वयेगुयात शान्ति प्रक्रियाय् सकारात्मक पलाः जूगु न्ह्यथंगु खः । चितवनया शक्तिखोरय् ग्वसाः ग्वःगु समारोहपाखें जनसेना विशेष समिति मातहत वःगु घोषणा जुइवं हे पिकाःगु विज्ञप्तिइ शान्ति प्रक्रियाया ल्यं दनीगु ज्या नं याकनं पूवंकेत इनाप यानातःगु खः । अमेरिकां जनसेनायात विशेष समिति मातहत हयेफूगुलिं सरकार व राजनीतिक दलतय्त भिंतुना नापं ब्यूगु दु ।
नेपाःया नितिं भारतीय राजदूत राकेश सुदं नेपाःया न्ह्यानाच्वंगु शान्ति प्रकृयां सकारात्मक मोड काःगु धयादीगु दु । स्वंगूगु डिभिजन शक्तिखोरय् पत्रकारपिंलिसे खँल्हानादिसें राजदूत सुदं शान्ति प्रक्रियाय् बिचाः यानाःगु कथंया प्रगति जूगु धयादीगु खः ।

थ्वहे दथुइ सेना समायोजन विशेष समिति सचिवालयया कजि बालानन्द शर्मां शक्तिखोरय् पत्रकारतलिसे खँल्हानादिसें जनसेना हस्तान्तरण लिपा शान्ति प्रक्रियायात न्हूगु उचाइलय् थ्यंकेत थप बल जुइगु धयादीगु खः । कजि शर्मां दलतदथुइ सहमति कायम जुयाः जनसेनाया याकनं समायोजन जुइगुलिइ थः विश्वस्त दुगु धयादीगु खः ।