नेपालय् दुरुया माग च्यागू प्रतिशतं अप्वल

येँ (झीगु स्वनिगः)

नेपालय् लिपांगु इलय् दुरुया माग आपालं अप्वयाः वयाच्वंगु दु । निदँ न्ह्यःतक्क मिल्क होलिडे यायेत बाध्य थनया किसानतय्सं आः वयाः मागकथं पूर्ति यायेफयाच्वंगु मदु । नेपालय् दुरु उत्पादनय् दँय्दँसं प्यंगू प्रतिशतं वृद्धि जुइगु याःसां नं माग धाःसा च्यागू प्रतिशतं वृद्धि जुयाच्वंगु दुग्ध गतिविधिलिसे सम्बद्ध सरकारी संस्था राष्ट्रिय पशु प्रजनन् केन्द्रं जानकारी ब्यूगु दु । थ्व केन्द्र मध्य लिसे पश्चिम नेपाःया थीथी क्षेत्रय् ज्या यानाः वयाच्वंगु दु । लिपांगु इलय् वयाः चितवन मिल्क थेंज्याःगु तःधंगु दुग्ध उद्योग सञ्चालनय् वःगुलिं दुरुया माग छक्वलं अप्वःगु प्रजनन् केन्द्र पोखराया प्रमुख डा. विमलकुमार निर्मलं जानकारी बियादीगु खः ।

वय्कःयाकथं थौंकन्हय् थीथी उद्योगं पिनेपाखें दुरु आयात यानाः वयाच्वंगु दु । चितवन मिल्कया प्रबन्धक उदय पण्डितं दुरुया अभावय् थौंकन्हय् थःथःगु उद्योगपाखें स्वीगू प्रतिशत जक उत्पादन यायेफूगु जानकारी बियादिल । दुरु अझ नं न्हियान्हिथं प्यंगू लाख न्यय्द्वः लिटरतक्क नेपाली बजारय् मगाः मचाः जूगु डा. निर्मलया धापू खः । नेपालय् द्वःछि व खुसः स्वयाः अप्वः दुग्ध उत्पादक सहकारी संस्था सञ्चालनय् वःसां नं थीथी कारणं माःगु कथं दुरु उत्पादन जुइफयाच्वंगु मदु । उन्नत नश्लया अभाव, पशुया प्रजनन् नीति कार्यान्वयन मजूगु लिसें कृत्रिम गर्भाधान प्रक्रियाय् दक्ष जनशक्तिया अभाव थेंज्याःगु उत्पादन थहांमवंगु पशु विज्ञतय्सं जानकारी ब्यूगु दु । नेपालय् सुख्खा यामय् प्यंगू लख न्यय्द्वः व वषर्यामय् निगू लख स्वीन्याद्वः लिटरतक्क दुरुया न्हियान्हिथं अभाव खनेदयाच्वंगु खः । सन् २०१० य् नेपालय् सा लिसे मेय्पाखें झिंप्यंगू लख पीद्वः मेटि्रक टन दुरु उत्पादन जूगु राष्ट्रिय पशु प्रजनन् केन्द्र पोखराया तथ्याङ्क दु ।

More Stories Like this