पर्यटन दँ बेखवर मुस्ताङ

राष्ट्रया शान्ति, सम्वृद्धि व स्थायित्वया नितिं नेपाल पर्यन दँ २०११ या तःधंगु समारोहयादथुइ शुभारम्भ जुयाःच्वंबलय् प्रशस्त पर्यकीय सम्भावना क्वःबियाः च्वंगु मुस्ताङ जिल्ला धाःसा सुनसान जुयाच्वंगु दु । तसकं चिकुगुया कारण मुस्ताङ भ्रमणय् वइपिं स्वदेशी लिसे विदेशी पर्यटकतय्गु छु नं चहः पहः मजुयाः स्थानीयबासीइ पर्यन दँया थालनीं छु नं रौनकता हयेफूगु मदु । मुख्य सिजनय् न्हिं २०/२५ गू हवाई उडान जुइगु जोमसोमय् पर्यटन दँ शुभारम्भया दिं निगू जक उडान जूगु खः, गुकिइ ६/७ म्ह जक विदेशी पर्यटक दुगु खः । थ्व इलय् थनया उडानत चिकुला छलय् यायेत मुस्ताङ पिने वनीपिं कर्मचारी व स्थानीयबासीं जायाः च्वंगु दु । पर्यटन दँ १० लख विदेशी पर्यटक दुकायेगु लक्ष्य कयाः च्वंगु इलय् पर्यटकतय्गु छगू मुख्य गन्तव्यस्थल मुस्ताङय् वइपिं पर्यटकया नितिं थप न्हूगु प्याकेज तयार जूगु मदुनि । गुलिखय् व्यवसायीत पर्यटन दँयाबारे थःपिंत छु नं जानकारी मदुगु धयादिल ।

अन्नपूर्ण पदयात्रा मार्गया मुख्य थासय् पर्यटकया सुविधाया नितिं पूर्वाधार, प्रचार प्रसार लिसे न्हूगु गन्तव्य स्थलतय्गु पहिचानपाखे ध्यान वनेफयाच्वंगु मदु । हिमालउखेया थुगु जिल्ला पर्वतारोहण, साहसिक पर्यटन, धार्मिक, साँस्कृतिक पर्यटनया लिसलिसे कृषि पर्यटन, कासा पर्यटन व पर्यापर्यटनया दृष्टिं देय्या हे प्रशस्त सम्भावना दुगु जिल्ला जुयाः नं थुकिया बजारीकरण जुइमफयाः तःधंगु ल्याखय् पर्यटकतय्त आकषिर्त यायेफयाच्वंगु मदु । प्राकृतिक सम्पदा, सांस्कृतिक विविधता व धार्मिक विशिष्ठतां धनी जुयाः नं उकियात पर्यटकीय क्रियाकलापय् बहः बिइमफयाः थनं वइपिं पर्यटकतय्गु च्वनेगु ई ताःहाकः यायेमफूगु स्थानीय पर्यटन व्यवसायीतय्सं स्वीकार याःगु दु । थनया दामोदर कुण्ड, ढुम्बा ताल, टिटी ताल, सेकोङ ताल थेंज्याःगु आपालं ताल लिसे कुण्डत पर्यटकया पहुँच स्वयाः ताःपाः । धौलागिरी -८,१६७ मि.), निलगिरी -७०६० मि.), तिलिचो पिक -७१३९ मि.) निसें याककावा पिक, धम्पुस पिक, टुकुचे पिक, दामोदर हिमाल आदि मध्ये गुलिखय् चुचुरात पर्वतारोहणया नितिं बन्देज तःगु दु । हिन्दु व बौद्ध धर्मावलम्बीया आस्थाया केन्द्रबिन्दु मुक्तिनाथ देगः दुनाः वयेफु धकाः भूगर्भविद्तय्सं आपालं दँ न्ह्यःनिसें सः तयाः वयाच्वंसां नं उकिया संरक्षणपाखे आःतक्क नं छु नं धिसिलाःगु कुतः जूगु मदुनि । गुम्बै गुम्बाया जिल्लायारुपं म्हस्यूगु थन तःधंगु चीधंगु यानाः खुइप्यंगू गुम्बात दुसां नं उकिया सांस्कृतिक लिसे धार्मिक पक्षयाबारे प्रचार प्रसार जुइमफयाः पर्यटकत उकिंपाखें नं अनभिज्ञ जुइमाःगु अवस्था दु । पर्यटक आकर्षक यायेत पर्यटन दँया लसताय् जिल्लाया थीथी थासय् भेला लिसे महोत्सवया ग्वसाः ग्वयेगु तयारी धाःसा जूगु दु ।

जिल्ला पर्यटन समितिया संयोजक चन्द्रबहादुर थकालीयाकथं वइगु फागु पूणिर्माया लसताय् मार्फा, लेतेय् विशेष ज्याझ्वःत जुयाच्वंगु दुसा वैशाखपाखें कागबेनी व मुक्तिनाथय् तीर कयेकेगु धेंधेंबल्लाः कासा यायेत, भदौलय् माथिल्लो मुस्ताङ व असोजय् जोमसोमय् महोत्सवया ग्वसाः ग्वःगु जूगु दु । पर्यटन दँ विदेशी पर्यटकतय्त जक मजुसे आन्तरिक पर्यटकयात नं आकषिर्त यायेत थज्याःगु मेला, महोत्सवपाखें ग्वाहालि जुइगु वय्कःया धापू दु । हिउँदया ई ज्वःछि हे चिकुइगु जूगुलिं नं मंसिरनिसें माघतक्क तसकं चिकुइगुलिं पर्यटकतय्गु आगमन कम जुइगु जूगुलिं स्थानीय होटल व्यवसायीत जिल्ला त्वःतेगु यानाच्वंगु मार्फास्थित गीता होटेलया सञ्चालक गीता शेरचनं जानकारी बियादिल । थ्व इलय् सदरमुकामया बच्छि स्वयाः आपालं होटल लिसे लजत बन्द जुयाच्वंगु दु । थौंकन्हय् दच्छिया करिब नीद्वः विदेशी पर्यटकं मुस्ताङया भ्रमण यायेगु यानाच्वंगु दु । खेतीपाती व पशुपालन बांलाक्क जुइमफइगु जूगुलिं विशेषयानाः पर्यटन व्यवसायपाखें जीविकोपार्जन यायेत थनया बासिन्दा पर्यटक आगमनय् कमी वःसा थप आर्थिक सङ्कटय् लायेपूःगु खतरापाखे सचेत जुइगु यानाच्वंगु दु ।

More Stories Like this